Almaty oblysynda jeke kýálik, pasportqa tólengen 34 mln teńge salyq bıýdjetke túspegen

TALDYQORǴAN. QazAqparat - Almaty oblysynyń sybaılas jemqorlyqpen kúres qyzmeti tólqujattar men kýálikter berý úshin memlekettik baj salyǵyn tóleý salasynda sybaılas jemqorlyqqa qarsy monıtorıng júrgizý kezinde zańsyzdyqty anyqtady, - dep habarlaıdy QazAqparat tilshisi.

Almaty oblysynyń eki aýdanynda 2019-2021 jyldar aralyǵynda bıýdjetke 34,1 mln teńge somasynda memlekettik baj túspegen. Memlekettik baj salyǵyn tóleýden jaltarý faktileri salyq qyzmeti organdarynyń tekserý aktilerimen rastalǵan.

«Anyqtalǵan faktiler kóshi-qon qyzmeti qyzmetkerleriniń «Azamattarǵa arnalǵan úkimet» KEAQ qyzmetkerlerimen, sondaı-aq memlekettik qyzmet alý kezinde ózge de tulǵalarmen sybaılas jemqorlyq shemalary men alaıaqtyq áreketteriniń bar ekenin kórsetedi»,- delingen Almaty oblysynyń sybaılas jemqorlyqpen kúres qyzmetiniń habarlamasynda.