Almaty oblysynda jaıaý júrginshini kólik qaǵyp, mert qyldy
TALDYQORǴAN. QazAqparat - Almaty oblysynda jaıaý júrginshini qaǵyp, qashyp ketken júrgizýshi ustaldy, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, 21 qyrkúıek kúni saǵat 23:00 shamasynda Іle aýdanynda «Nur-Sultan – Almaty» avtojolynyń 59-shaqyrymynda ońtústik baǵytta kele jatqan belgisiz kólik Aqshı aýylynyń 46 jastaǵy turǵynyn qaǵyp ketken.
Er adam oqıǵa ornynda kóz jumǵan. Atalǵan derek QR QK 345-babynyń 3-bóligi boıynsha tirkeldi.
Jedel-izdestirý josparyna sáıkes, mamandar kúdiktiniń izine tústi. Tártip saqshylary kórshi Qarasaı aýdanyndaǵy jeke úıdiń aýlasynda kólik izderi bar, jasyrylǵan «Toıota Avalon» avtokóligin tapty.
Kóliktiń zaqymdanǵan jeri uqyptap matamen jasyrylǵan. Júrgizýshi Isaevo aýylynyń 60 jastaǵy turǵyny eken. Ol óziniń adam qaǵyp ketkenin moıyndap, oqıǵa ornynan qoryqqannan qashyp ketkenin jetkizdi.
«Júrgizýshiler oqıǵa ornynan qashyp ketken jaǵdaıda qylmysty ashý qıyn. Alaıda jeke ýaqytpen sanaspaı, josparly jáne muqııat jumys istelse, mańyzdy dálelderdi taýyp, kúdiktini áshkereleýge árqashanda múmkindik bar. Bizdiń isimizde usaq-túıek bolmaıdy. Keıde kishkentaı usaq-túıek te qashyp ketken júrgizýshini ustaýǵa kómektesedi»,-deıdi Almaty oblysy PD JPQB izdestirý tobynyń ınspektory, polıtsııa maıory Aldııar Taıbekov.
