Almaty oblysynda «Jaýyngerlik baýyrlastyq-2017» UQShU oqý-jattyǵýy ótti
Oqý-jattyǵý barysynda UQShU Ujymdyq bitimgershilik kúshteriniń qurylýy, UQShU-nyń quramyna kirmeıtin memleket aýmaǵynda BUU Qaýipsizdik Keńesiniń buryshtamasy boıynsha ótkiziletin beıbitshilikti ustap turý jónindegi operatsııa aýdanynda olardyń óristetilýi, beıbitshilikti ustap turý jóninde operatsııany júrgizý, sondaı-aq bitimgershilik tapsyrmalardy oryndaý kezinde halyqaralyq uıymdarmen ózara is-qımyl jasaý máseleleri pysyqtaldy. Oqý-jattyǵýdyń belsendi fazasynda bitimgershilik bólimshelerdiń jeke quramy is júzinde baqylaý-ótkizý jáne baqylaý pýnktterinde qyzmet ótkerý, jergilikti jer men eldi mekenderdi patrýldeý, mańyzdy nysandardy kúzetý, jer men nysandardy mınasyzdandyrý, radıatsııalyq, hımııalyq jáne bıologııalyq barlaýdy júrgizý, órt saldaryn joıý, jappaı tártipsizdikterge qarsy turý, izgilik júkterdi alyp júrý, zańsyz qarýly quralymdardy oqshaýlaý jáne joıý kezindegi is-qımyldardy pysyqtady. Ujymdyq bitimgershilik kúshteri bólimsheleriniń komandırleri bitimgershilik tapsyrmalardy oryndaýdy uıymdastyrýda, beıbitshilikti ustap turý jóninde operatsııany júrgizý barysynda bólimshelerdi basqarý, ózara is-qımyldy uıymdastyrýda praktıkalyq mashyqtaryn jetildirdi. Oqý-jattyǵýdyń ereksheligi UQShU Ujymdyq bitimgershilik kúshteriniń múddesinde avıatsııalyq komponent, onyń ishinde, ushqyshsyz ushý apparattary, sondaı-aq psıhologııalyq kúres jáne aqparattyq qarsy kúres bólimsheleri tartyldy.
Oqý-jattyǵý barysynda UQShU UBK poıtseıler personalynyń is-qımyldaryn BUU Polıtsııa departamentiniń qoǵamdyq tártip jónindegi keńesshisi Djordjıo Djıaımo qadaǵalap otyrdy. Sondaı-aq oqý-jattyǵýǵa baqylaýshylar retinde Qazaqstan Respýblıkasynda akkredıttelgen áskerı-dıplomatııalyq korpýs ókilderi, halyqaralyq jáne óńirlik uıymdardyń (BUU, QKHK), buqaralyq aqparat quraldarynyń ókilderi qatysty.
«Jyl saıyn ótkiziletin oqý-jattyǵýlar men jattyqtyrýlarda ofıtserler, serjanttar jáne sarbazdar jaqsy praktıka jáne tájirıbe jınaqtaıdy, ózara is-qımyl máselelerin pysyqtaýǵa múmkindikteri bar. BUU-nyń ádistemeleri men standarttary boıynsha beıbitshilikti ustap turý jóninde zamanaýı keshendi operatsııalardyń ótkizilýin eskere otyryp, arnalym boıynsha is-qımyldarǵa Uıymnyń bitimgershilik kúshterin daıyndaýdy jetildirý júrýde. Búgin biz «Myzǵymas baýyrlastyq-2017» oqý-jattyǵýy - bitimgershilik kontıngentterimizdiń birlesken daıyndyǵynyń negizgi kezeńin aıaqtaımyz. Sizderge oqý-jattyǵý barysynda kórsetken joǵary kásibılikterińiz, tanytqan ynta-jigerlerińiz ben keremet mashyqtaryńyz úshin alǵys bildiremin», - dedi óz sózinde Qorǵanys mınıstriniń birinshi orynbasary - QR QK Bas shtabynyń bastyǵy general-leıtenant Murat Maıkeev.
«Myzǵymas baýyrlastyq-2017» oqý-jattyǵýy «Jaýyngerlik baýyrlastyq-2017» jedel-strategııalyq oqý-jattyǵýynyń kezekti kezeńi bolyp tabylatynyn aıta ketý qajet. 2017 jylǵy qarashanyń 10-y men 20-y aralyǵynda Tájikstan Respýblıkasynyń aýmaǵynda UQShU Ujymdyq jedel den qoıý kúshteri kontıngentteriniń tapsyrmalardy oryndaýy sheshýshi kezeń bolmaq.
