Almaty oblysynda jas otbasylar baıqaýy ótedi
ASTANA. QazAqparat - Óńirde bıylǵy jyly «Máńgilik el -máńgilik otbasy» oblystyq jas otbasylar baıqaýy altynshy márte uıymdastyrylyp otyr, dep habarlaıdy Almaty oblysy ákimdiginiń baspasóz qyzmeti.
Baıqaýdyń maqsaty jastardy otbasylyq qundylyqtardy qurmetteı bilýge shaqyrý, qazaq halqynyń salt-dástúr, ádet- ǵuryptaryn saqtaı otyra, dostyǵy uıyǵan otbasylardy jan-jaqty nasıhattaý, bolashaq jastarǵa patrıottyq tálim-tárbıe berýge, memlekettik jastar saıasatyn júzege asyrýǵa baǵyttalǵan. Bul týraly Almaty oblysynyń óńirlik kommýnıkatsııalar qyzmeti alańynda belgili boldy.
«Baıqaý 2012 jyldan beri bastaý alyp, jyl saıyn ótkiziletin dástúrge aınaldy. Byltyr Kóksý aýdany, Balpyq bı aýyly, «Asmadırýs» demalys ortalyǵynda ótse, bıyl qalamyzdaǵy «Erasyl» demalys ornynda ótkiziledi. Osy baıqaýǵa qatysý úshin aldymen ár aýdanda irikteý ótedi. Tek sol kezeńderden ótken jas otbasylar ǵana qatysa alady. Jáne jyl saıyn jas otbasylardyń qatysý sany artyp keledi. Ótken jyly 9 otbasy qatyssa, osy jyly 16 otbasy qatysýǵa ótinish bildirip otyr», - dedi oblystyq jastar saıasaty máseleleri basqarmasynyń basshysy Aıdyn Nurmuhambetuly.
Aıta ketsek, baıqaý aǵymdaǵy jyldyń 8 qyrkúıeginde Taldyqorǵan qalasy, «Erasyl» demalys ornynda ótedi. Oǵan 20-29 jas aralyǵyndaǵy 4-6 jas aralyǵyndaǵy balalary bar jas otbasylar qatysa alady. Sharaǵa kásibı ánshi, bıshi, teatr ártisi qatystyrylmaıdy. Atalmysh otbasylyq baıqaý
«Júırik bolsań, shaýyp kór», «Ata kórgen oq jonar, Ana kórgen ton pisher» «Tanystyrý» «Ónerlige óris keń» syndy kezeńderden turady.
