Almaty oblysynda jas kelinshek óz balasyn óltirdi dep kúdikke ilindi
TALDYQORǴAN. QazAqparat - Almaty oblysynyń polıtsııasy óz balasyn óltirdi dep kúdikke ilingen 19 jastaǵy áıeldi ustady, dep habarlaıdy QazAqparat.
Oblystyq ІІD-de baıandaǵandaı, bul derek Talǵar aýdanyndaǵy kentterdiń birinde tirkeldi. 10 qazan kúni munda 1,5 jasar balanyń ólimi anyqtaldy. Óz kezeginde, polıtseıler ólim sebebin anyqtaý úshin sot-medıtsınalyq saraptama taǵaıyndady. Onyń aldyn ala qorytyndysy boıynsha, sábıdiń ólimi mehanıkalyq asfıksııa saldarynan bolǵan.
Tártip saqshylary QR QK 99-babynyń 2-bólimimen («Adam óltirý») qylmystyq is qozǵady.
«Asa aýyr qylmys jasady degen kúdikpen qaıtys bolǵan balanyń 19 jastaǵy anasy ustaldy. Qazirgi kezde kúdikti áıel Qylmystyq-protsessýaldyq kodekstiń 128-babyna sáıkes aýdandyq polıtsııanyń ýaqytsha oqshaýlaý kamerasyna qamaýǵa alyndy. Sot aldyndaǵy tergeý jumystaryn Talǵar AІІB qyzmetkerleri júrgizýde, sondaı-aq ol oblystyq tergeý basqarmasynyń baqylaýynda tur», - dep habarlady vedomstvonyń baspasóz qyzmetinen.
Atalǵan faktiniń mán-jaıy sot aldyndaǵy tergeý barysynda anyqtalady.
