Almaty oblysynda jarylys bolǵan úıden oq-dáriler men dinı ádebıetter tabyldy - QR Bas Prokýratýrasy
ASTANA. 13 shilde. QazAqparat - QR Bas Prokýratýrasy Almaty oblysynda jarylys bolǵan úıdiń ishinde oq-dárilerdiń tabylǵanyn rastady.
«Tergeý-jedel toby oqıǵa ornyn tekserýdi keshe bastap, búgin jalǵastyrdy. Nátıjesinde úıdiń garajynan oq qarýy, oq-dáriler, polıtseılik kıim men dinı ádebıetter tabyldy», -delingen 12 shilde, beısenbi kúni eldiń basty qadaǵalaý organynyń baspasóz qyzmeti taratqan habarlamada.
Qylmystyq fakti boıynsha Almaty oblystyq prokýratýrasy QK-niń 24-babynyń 1-bólimi - 233-bólimniń 3-tarmaǵy «b» tarmaqshasymen (lańkestikke daıyndalý) qylmystyq isti qozǵady.
Bas prokýratýradan sondaı-aq qazirgi ýaqytta qajetti sot saraptamalary taǵaıyndalyp, tergeý amaldary júrgizilip otyrǵany, qaza tapqandardyń esimderi, sondaı-aq oqpen atylatyn qarýdyń, oq-dáriniń jáne polıtsııa kıiminiń shyǵý tegi anyqtalǵany habarlandy.
Esterińizge sala keteıik, 11 shilde kúni Almaty oblysyndaǵy Qarasaı aýdanyna qarasty «Taý samaly» kentindegi úıde jarylys, odan keıin órt boldy. Jalyn tili 100 sharshy metr aýmaqty sharpyǵan. Oqıǵa ornynda segiz adamnyń janyp ketken múrdeleri tabyldy, olardyń ishinde tórteýi - balalar.
