Almaty oblysynda jarty mıllıard teńgege tartylǵan gaz qubyrlary qırap jatyr
TALDYQORǴAN. QazAqparat - Almaty oblysynda jarty mıllıardqa tartylǵan gaz qubyrlary qazir synyp, qulap jatyr, - dep habarlaıdy QazAqparat tilshisi.
Joǵary qysymdy gaz qubyrlary Jambyl aýdanynyń bes aýylyna 2014 jyly tartylǵan. Biraq 7 jyl ótse de bul qubyrlar tek aýyldyń syrtyna deıin ǵana jetkizilip, aýyldyń ishine kirgizilmegen. Jumys aıaqsyz qalǵan.
«2014 jyly 491 mln teńgege sol Jambyl aýdanynyń bes aýylyna joǵarǵy qysymdy gaz qubyry tartylǵan. Jergilikti bıýdjetten, respýblıkalyq bıýdjetten gazǵa qarjy bólinbegennen joǵarǵy qysymdy gaz aýylǵa deıin tartyldy, biraq aýyldyń ishine kirmedi», - dedi Almaty oblystyq energetıka jáne turǵyn úı-kommýnaldyq sharýashylyq basqarmasynyń basshysy Baǵlan Tánekenov.
Aıta keteıik, gaz qubyrlary Jambyl aýdannyń Balǵabek Qydyrbekuly, Jaısan, Kókdala, Qazbekbek beketi, Aqseńgir aýyldaryna tartylǵan. Biraq bastalǵan jumys aıaqsyz qaldy. Endi naqty bul aýyldardyń ishine gaz qubyrynyń qashan júrgiziletini belgisiz.
Almaty oblystyq energetıka jáne turǵyn úı-kommýnaldyq sharýashylyq basqarmasynyń basshysy Baǵlan Tánekenovtiń sózinshe, qarajattyń bólingenine baılanysty jumystar júrgiziledi.
Jalpy, Almaty oblysyn sońǵy bes jylda gazben qamtamasyz etý úshin 65 mlrd teńge bólingen. Eldi-mekenniń 31 paıyzy ǵana gazben qamtylǵan.
