Almaty oblysynda janarmaı quıý beketine qaraqshylyq jasaǵan kúdiktiler ustaldy
TALDYQORǴAN.QazAqparat - Almaty oblysynyń Talǵar aýdanyndaǵy janarmaı quıý beketine túnde qaraqshylyq jasaǵan qylmystyq toptyń eki múshesi ustaldy,- dep habarlaıdy QazAqparat tilshisi.
Almaty oblystyq Polıtsııa departamentindegi baspasóz qyzmetiniń málimetinshe, oqıǵa 6-shy aqpan kúni bolǵan. Sol kúni túnde bir top adam janarmaı quıý beketine basa-kóktep kirip, operator men kúzetshini belgisiz qarýmen qorqytyp, kassadaǵy 27 000 teńgeni tartyp alǵan.
«Bul is boıynsha QR Qylmystyq kodeksiniń 192-babynyń 2-tarmaǵyna sáıkes qaraqshylyq deregi boıynsha sotqa deıingi tergeý amaldary júrgizilýde. Kúdiktilerdiń tulǵalary anyqtaldy. Olardyń biri oqıǵa ornyna jaqyn mańda jergilikti turǵyndardyń kómegimen ustalsa, jedel-izdestirý sharalary barysynda ekinshi kúdiktiniń mekenjaıy anyqtalyp, Almaty qalasynda qolǵa tústi. Qolǵa túsken kúdiktilerden qylmys jasaý kezindegi paıdalanǵan tapansha men urlanǵan aqshanyń bir bóligi tárkilendi. Olar tergeý materıaldaryna aıǵaqzat retinde tirkeldi»,- dep tolyqtyrady baspasóz qyzmeti.
Vedomstvo taratqan aqparatqa sáıkes, kúdiktiler aýdandyq polıtsııanyń ýaqytsha ustaý oqshaýlaǵyshyna qamaqqa alyndy. Tártip saqshylary kúdiktilerdiń ózge de qylmystarǵa qatysy baryn anyqtaýda. Bul fakti boıynsha tergeý jalǵasýda.
