Almaty oblysynda Jańa jyl merekesinde 14 órt oqıǵasy tirkeldi
TALDYQORǴAN. QazAqparat - Jańa jyldy merekeleý kezeńinde Almaty oblysynda 14 órt oqıǵasy oryn alǵan. Sonyń ishinde tórteýi pırotehnıkalyq buıymdardy paıdalaný kezinde órt qaýipsizdigi erejelerin buzý saldarynan boldy. Bul týraly aımaqtyq TJD baspasóz qyzmetine silteme jasaǵan QazAqparat tilshisi habarlaıdy.
«2019 jyldy qarsy alǵannan keıin, Tekeli qalasynyń Jeńis kóshesinde saǵat 12:15-te jáne Qarasaı aýdanynyń Qaskelen qalasyndaǵy «Asyl arman» shaǵynaýdanynda saǵat 12:20-da otshashý shoqtarynyń balkondarǵa túsýi saldarynan balkondar men ondaǵy kıimder órtene bastady. Jalyn 2 sharshy metr aýmaqty sharpyǵan. Al Jambyl aýdanynyń Qasymbek aýylynda saǵat 12:40-ta jáne Raıymbek aýdanynyń Kómirshi aýylynda saǵat 01:10-da jekemenshik turǵyn úılerdiń aýmaǵyndaǵy 4,5 jáne 10 tonna shóp órtengen. Joǵaryda atalǵan barlyq órt oqıǵalary atalǵan aýdandardyń órt sóndirý bólimsheleriniń kúshimen sóndirildi. Qaza tapqandar men zardap shekkender joq», - delingen qutqarýshylardyń habarlamasynda.
Olardyń aıtýynsha, órttiń shyǵýyna pırotehnıkalyq buıymdar - otshashý, petarda, raketalardy durys paıdalanbaı, órt qaýipsizdigi erejelerin buzý sebep boldy.
«Qalyptasqan jaǵdaıdy esepke ala otyryp, bolashaqta olardyń qaıtalanbaıtynyna úmittenemiz, sebebi aldaǵy ýaqytta Rojdestvo jáne eski jańa jyl merekeleri jaqyndap keledi. Órt qaýipsizdigi erejelerin qatań túrde saqtaý ǵana adamdardy merekelerdi jaqsy qarsy alyp, túrli jaraqattardan qorǵaıdy», - dep atap ótti Almaty oblystyq TJD turǵyndardy aqparattandyrý jáne oqytý tobynyń qyzmetkerleri.
