Almaty oblysynda jańa zaýyttar iske qosyldy

Bul jóninde búgin óńirlik kommýnıkatsııalar ortalyǵy uıymdastyrǵan baspasóz máslıhatynda oblys ákiminiń orynbasary Serik Turdalıev málim etti, dep habarlaıdy «QazAqparat» HAA tilshisi.

Onyń sózinshe, jańadan iske qosylǵan nysannyń biri shyny ydysyn shyǵarady. Jylyna 120 mln. bótelke shyǵarýǵa qaýqarly zaýytta 400 jumys orny ashyldy. Salynǵan ınvestıtsııa kólemi - 11 mldr. teńge.

Al  ekinshi nysan «HolandGrınTek» JShS-da jylyjaılarǵa arnalǵan metall konstrýktsııalary óndiriledi. Zaýytqa 2 mlrd teńgeden astam ınvestıtsııa tartylyp, 50 adam jumyspen qamtyldy.

Sonymen qatar, 16 jeltoqsanǵa deıin Talǵar aýdanynda plastık ónimderin shyǵaratyn zaýyt, «Asyl qus Agro» JShS qus fabrıkasy, rezeńke plıtkalaryn óndiretin «Artpraım Qazaqstan» JShS iske qosylatyn bolady.  

Aıta ketý kerek, Almaty oblysynda «25 juldyzdy kún» aktsııasy aıasynda 25 kásiporynnyń ashylýy kútiledi. 2 myńnan astam halyqty jumyspen qamtý kózdelgen jobalardyń jalpy ınvestıtsııalyq kólemi 48,3 mlrd. teńgeni quraıdy.

Buǵan deıin ındýstrııalandyrý kúnine oraı ótkizilgen tikeleı telekópir barysynda 25 kásiporynnyń biri tanystyrylǵan bolatyn. Tekeli qalasynda shoıyn shyǵaratyn taý-ken óńdeý kesheni ashyldy. Ol tolyq qýatyna shyqqanda 500 jańa jumys orny ashylatyny josparlanýda. Sonymen qatar, Sarqan aýdanynda 17 MVt Lepsi SES-i iske qosyldy. Jobanyń jalpy quny 4,2 mlrd. teńge.