Almaty oblysynda jalǵan aqsha jasaıtyn tseh tabyldy
TALDYQORǴAN. QazAqparat - Almaty oblysynda jalǵan aqsha jasaıtyn tseh tabyldy, dep habarlaıdy QazAqparat tilshisi.
Oqıǵa ornynan «EPSON» markaly túrli-tústi kóshirý apparaty, qaǵaz kesýge arnalǵan stanok, laktar, boıaýlar, sııalar jáne aqsha kýpıýralarynyń úlgileri tárkilendi.
«8 qyrkúıek kúni Almaty oblysy boıynsha Ekonomıkalyq tergeý departamentiniń qyzmetkerlerimen jedel-izdestirý is-sharalaryn júrgizý barysynda Talǵar qalasynda 10 000 teńge jáne 5000 teńge nomınaldyq jalǵan aqsha kýpıýralaryn daıyndaıtyn jasyryn tsehty uıymdastyrǵan 1989 jyly týǵan Qazaqstan Respýblıkasynyń azamaty ustaldy. Atalǵan fakti boıynsha Qylmystyq kodekstiń 231-baby 1-bóligi (Ulttyq banktiń jalǵan banknottaryn ótkizý maqsatynda daıyndaý jáne saqtaý) boıynsha qylmystyq isi qozǵaldy», - dedi atalǵan vedomstvonyń baspasóz qyzmetiniń ókili aǵa tergeýshi Idrısova Aınur Bolatqyzy.
Vedomstvonyń málimetinshe, Almaty oblysynyń saýda oryndarynda osy jalǵan aqsha qarajatyn ótkizý faktileri anyqtaldy. Tergeý jalǵasýda.
