Almaty oblysynda zeınetkerdi tonaǵandar ustaldy
TALDYQORǴAN. QazAqparat - Almaty oblysynyń polıtseıleri iz-túzsiz joǵalǵan zeınetkerdi izdep tapty. Almaty qalasynyń aýrýhanalarynyń birine aýyr jaraqatpen túsken qart kisige belgisiz bireýler qaraqshylyq shabýyl jasaǵan. Qazir kúdiktiler anyqtalyp, qamaýǵa alyndy, dep habarlaıdy QazAqparat tilshisi.
2 qyrkúıekte Qarasaı aýdanynyń ishki ister bólimine 72 jastaǵy Іrgeli aýylynyń turǵynynyń habarsyz ketkeni týraly aryz túsedi. Joǵalǵan qarııany tártip saqshylary Almaty aýrhanasyna jedel járdemmen aýyr halde túskenin anyqtaıdy. Belgisiz bireýler zeınetkerdi uryp soǵyp, aqshasy men uıaly telefonyn tartyp alǵan. Jedel izdestirý sharasy barysynda oqıǵa bolǵan jerdegi beınekameralar tekserilip, kúdiktilerdiń bet-beınesi belgili boldy.
Almaty oblystyq ІІD baspasóz qyzmetiniń málimdeýinshe 1974 jáne 1992 jylǵy jergilikti turǵyndar qamaýǵa alynǵan. Olarǵa QR QK 192-baby «qaraqshylyq» boıynsha sot aldy tergeý jumystary bastaldy. Al jábir kórgen zeınetker dárigerler baqylaýynda.
