Almaty oblysynda zeınetkerdi qaǵyp óltirgen júrgizýshi ustaldy
TALDYQORǴAN.QazAqparat - Almaty oblysynda 62 jastaǵy zeınetkerdi kóligimen qaǵyp, oqıǵa ornynan qashyp ketken kúdikti ustaldy. Qazir osy faktige baılanysty Qarasaı aýdanynyń turǵyny tergelip jatyr, dep habarlaıdy QazAqparat tilshisi.
Jol-kólik oqıǵasy Almaty-Astana tas jolynyń Qarasaı aýdanyndaǵy Ulan aýyly mańynda bolǵan. Mamyrdyń ekisinen úshine qaraǵan túni 62 jastaǵy zeınetkerdi kólik qaǵyp, mert qylǵan.
«Oqıǵa ornyndaǵy kóliktiń synyqtary arqyly mashınanyń aq tústi «Neksıa» ekenin anyqtadyq. Jedel izdestirý barysynda kóliktiń ıesin de taptyq. Ol Qarasaı aýdanynyń turǵyny bolyp shyqty. Qazir kúdikti ustalyp, aýdandyq ІІD bólimine jetkizildi. Al onyń kóligi arnaıy turaqqa qoıyldy», - dep málim etti Almaty oblystyq ІІD bólim basshysy Erlan Qarybaev.
Oblystyq ІІD málimetinshe, jyl basynan beri adam ólimimen aıaqtalǵan 11 jol-kólik oqıǵasy tirkelip, onyń barlyǵynda kólik júrgizýshileri oqıǵa orynan qashyp ketken. Qazir on fakti boıynsha júrgizýshiler ustalyp, qylmystyq jaýapkershilikke tartylýda.
