Almaty oblysynda zattardy tegin taratatyn dúken ashyldy
TALDYQORǴAN.QazAqparat - Almaty oblysynyń Aqsý aýdanynda «Bári de rahmet úshin!» dúkeni ashyldy. Bul oblys boıynsha isker áıelder keńesiniń bastamasymen ashylǵan úshinshi áleýmettik dúken, dep habarlaıdy QazAqparat tilshisi.
Aqsý aýdanynyń Іsker áıelder keńesiniń tóraıymy Baǵlan Naryshevanyń sózinshe, dúken ashylǵaly bir aı ishinde 50-den astam otbasyǵa kómek kórsetilgen. Áleýmettik dúken jergilikti «Qazposhta» fılıalymen bir ǵımaratta ornalasqan. Aýdandyq Kásipkerler palatasy jáne Aqsý aýdany ákimdiginiń qoldaýymen arnaıy bólme berilgen.
«Dúkenge balalar men úlkenderge arnalǵan kıimderdi, aıaq-kıimderdi, múgedekterge arnalǵan arbalardy, turmystyq zattardy, azyq-túlikterdi jınadyq. Múmkindigi shekteýli eki adamǵa arba berildi. Mysaly, kópbalaly otbasylarǵa qajetinshe 20-30 túrli zattar taratyldy. Qazirgi tańda biz bul ıgi iske sharýa qojalyqtaryn, qyzmet kórsetý salasyndaǵy bıznes ókilderin qatysýǵa shaqyryp otyrmyz», - deıdi Baǵlan Narysheva.
Al, aýyl turǵyny, kópbalaly ana Svetlana Grıgoreva ıgi bastamanyń nátıjesinde balalaryn mektepke daıyndaǵanyn jetkizdi.
«Biz osyndaı «qaıyrymdy» dúken ashylǵanyna qýanyshtymyz. Ýaqtyly túrde berilgen mańyzdy kómek boldy. Atalmysh áleýmettik dúkender aýyldy jerlerde kóptep ashylsa degen tilegimiz bar», - deıdi S.Grıgoreva.
Óz kezeginde Almaty oblysynyń Іsker áıelderiniń keńesi «Bári de rahmet úshin!» áleýmettik dúkenin Qapshaǵaı qalasynda jáne Qaratal aýdanynda ashýdy josparlap otyr.
