Almaty oblysynda zańsyz elik atty degen kúdikpen eki azamat ustaldy
NUR-SULTAN. QazAqparat – Ustalǵandardyń kóliginen eliktiń jiliktelgen eti tabylǵan. Áıtse de, olar etti jol boıynan taýyp alǵanyn aıtyp otyr, dep habarlaıdy QazAqparat tilshisi.
Tirkelgen jaǵdaıdy QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet feısbýk paraqshasynda jazdy.
«Іle-Alataý ulttyq parkiniń mobıldi top ınspektorlary reıdtik shara barysynda Kegen aýdany Almaty oblysy Almaty memlekettik qaýmalynyń aýmaǵynda «Honda» markaly avtokólikke mingen Almaty oblysynyń eki azamatyn N.D. (1981 j.t.) jáne K.U. (1981 j.t.) ustady. Kólikti tekserý barysynda bes paketke salynǵan eki elik ańynyń jiliktelgen eti, Vepr jáne Magným markaly eki qarý, 12 kalıbrli 21 oq, 223 kalıbrli 18 oq, 308 kalıbrli 2 oq, dúrbi men ártúrli pyshaqtar tabyldy», - dep jazady Sáken Dildahmet.
Kúdiktilerdiń aıtýy boıynsha, olar etti jol boıynda taýyp alyp, aýdandyq polıtsııa bólimine jetkizbekshi bolǵan.
Atalmysh fakti Kegen aýdandyq polıtsııa bóliminde tirkelip, sotqa deıingi tergep tekserý jumystary júrgizilýde.
