Almaty oblysynda zańsyz balyq aýlaǵandar jappaı ustalyp jatyr
TALDYQORǴAN. QazAqparat - Respýblıkalyq «Ýyldyryq shashý» jedel aldyn alý is-sharasy barysynda Almaty oblysynyń tártip saqshylary ózge tabıǵat qorǵaý organdarymen birlesip, zańsyz balyq aýlaýdyń 145 deregin áshkereledi. Onyń 18 faktisi boıynsha qylmystyq óndiris qozǵalyp, sotqa deıingi tergeý amaldary júrgizildi, dep habarlaıdy QazAqparat tilshisi.
Balqash aýdanynyń polıtseıleri balyq resýrstaryn qorǵaý ınspektorlarymen birge elektr toǵynyń kómegimen balyq aýlaǵan jergilikti turǵyndy qolǵa túsirdi. Tabıǵat qorǵaý zańnamasyn óreskel buzǵan kúdiktiden motorly qaıyq, elektr generatory jáne aýlanǵan balyqtar tárkilendi. Memleketke 200 myń teńgege jýyq materıaldyq shyǵyn keltirilgen.
Sondaı-aq, is-shara barysynda Kerbulaq aýdanynyń turǵynyna qatysty joǵalý qaýpi bar balyqty aýlaǵany úshin QR Qylmystyq kodeksiniń 339-babyna sáıkes is qozǵaldy.
«Ýyldyryq shashý» is-sharasy barysynda tabıǵat qorǵaý zańnamasynyń talaptaryn buzǵan 123 tulǵa ártúrli jaýapkershilikke tartyldy. Olarǵa jalpy somasy 1 mln 500 myń teńgeden astam aıyppul salyndy. Sonymen birge, quqyq buzýshylar memleketke keltirgen 8 mıllıonnan astam materıaldyq shyǵyndy sot sheshimimen el qazynasyna óteıtin bolady»,- dep atap ótti Almaty oblysy PD baspasóz qyzmetiniń resmı ókili Serik Ýpıev.
Vedomstvo taratqan aqparatqa sáıkes, quqyq buzýshylardan 5,5 tonnadan astam balyq tárkilenip, odan túsken qarajat memleket paıdasyna aýdarylǵan. Sonymen qatar, bes myń metrden artyq balyq aýlaıtyn aý jáne 13 qaıyq tárkilengen.
