Almaty oblysynda zańsyz balyq aýlaǵan brakonerler ustaldy
TALDYQORǴAN. QazAqparat - Almaty oblysyndaǵy Balqash aýdanynyń polıtseıleri zańsyz balyq aýlap júrgen brakonerlerdi qylmys ústinde ustady, dep habarlaıdy QazAqparat tilshisi.
Balqash aýdanynyń tártip saqshylary ózge de tabıǵat qorǵaý organdarynyń qyzmetkerlerimen birlesken arnaıy shara barysynda tyıym salynǵanyna qaramastan tabıǵı baılyqqa qol salǵan eki brakonerdi qolǵa túsirdi.
«18 mamyr kúni keshqurym Qaroı aýylynyń batysyndaǵy «Shubar Qunan» ózeginde eki azamat tabıǵat qorǵaý zańnamasynyń talaptaryn óreskel buzyp, balyq aýlap jatqan jerinde ustaldy. Kúdiktiler Talǵar qalasynyń 46 jastaǵy jáne Kegen aýdanynyń 48 jastaǵy turǵyny ekeni anyqtaldy. Brakonerlerden motorly sý qaıyǵy men 150 kelige jýyq balyq tárkilendi»,- dedi Balqash APB bastyǵynyń birinshi orynbasary polıtsııa podpolkovnıgi Nurgeldi Abırov.
Polıtsııa ókiliniń aıtýynsha, memleketke keltirilgen shyǵyn bir jarym mıllıon teńgeden asqan. Tárkilengen balyq tıisti qabyldaý oryndaryna ótkizilip, odan túsken qarajat memleket paıdasyna aýdarylady. Jyl basynan beri Balqash aýdanynyń tártip saqshylary tabıǵat qorǵaý zańnamasyn buzýdyń 6 oqıǵasyn, onyń ishinde 3 zańsyz ań aýlaý jáne 3 zańsyz balyq aýlaý deregin áshkerelegen.
Esterińizge sala keteıik, buǵan deıin oblystyq polıtseıler turǵyndarǵa balyqtardyń ýyldyryq shashý kezinde balyq aýlaýǵa tyıym salynatyny jáne 15 sáýirden mamyr aıynyń sońyna deıin «Ýyldyryq shashý» jedel aldyn alý is-sharasy ótkiziletini týraly habarlaǵan bolatyn.
