Almaty oblysynda zańsyz aınalymnan 4 tonnadan astam esirtki alynǵan
TALDYQORǴAN. QazAqparat - 2018 jyly Almaty oblysy aýmaǵynda 4 tonnadan astam esirtki zattary zańsyz aınalymnan alyndy. Bul týraly QazAqparat tilshisi oblystyq Polıtsııa departamentiniń baspasóz qyzmetine silteme jasap habarlaıdy.
Aıta keterligi, esirtki bıznesine qarsy kúreste oblystyq polıtsııanyń Kınologııa qyzmeti ortalyǵyndaǵy ıis alǵysh ıtter úlken kómek kórsetip otyr. Qazirgi kúni polıtsııa qyzmetkerleri esirtki men jarylǵysh zattardy izdeý, qylmyskerlerdiń izin kesý men ustaý áreketine 40-tan astam ıtti tartýda. Budan bólek, úıretilgen ıisshil ıtter polıtsııanyń aýmaqtyq bólimshelerinde, avtojoldardaǵy patrýl polıtsııasynyń beketterinde «jumys» isteıdi.
«Qyzmettik ıisshil ıtterdiń arqasynda 47 esirtki qylmysy ashylyp, 123 keli esirtki zattary tárkilendi. Onyń ishinde 12 kelisi «gashısh» bolyp shyqty. Sonymen qatar, Ulttyq qaýipsizdik komıteti departamentimen birlese otyryp, esirtki taratý arnalary jabyldy, 1 kelige jýyq geroın tárkilendi. Jalpy alǵanda esirtkimen baılanysty zańsyz operatsııalar úshin 505 adam ustaldy, olardyń 10-y sheteldik», - delingen baspasóz baıanynda.
