Almaty oblysynda zańsyz ańshylyqpen aınalysqandar ustaldy
TALDYQORǴAN. QazAqparat - Almaty oblysynyń Uıǵyr aýdanyndaǵy ań sharýashylyǵynyń birinen vıntovkamen, ańshy myltyǵymen qarýlanǵan úsh er adam ustaldy. Kúdiktilerdiń jol talǵamaıtyn kóliginen polıtseıler elik pen qabannyń bólshektengen etin tárkiledi, dep habarlaıdy QazAqparat tilshisi.
«Tekserý barysynda anyqtalǵanyndaı, ańǵa shyqqandarda tek bir qabandy atýǵa ǵana lıtsenzııa bolǵan. Al basqa ańdardy atýǵa qatysty ustalǵandar qandaı da bir ruqsat qujattar kórsetken joq. Sondyqtan da, elikti atý zańsyz bolyp tabylady», delingen oblystyq ІІD baspasóz qyzmeti taratqan habarlamada.
Polıtsııa qyzmetkerleri zańsyz ańshylyqpen aınalysty dep kúdik keltirilgen tulǵalardan tórt atys qarýyn tárkilegen. Onyń ishinde 12 kalıbrli bir ańshylyq qarýy esh jerde tirkelmegen, ıaǵnı zańsyz saqtalǵan qarý bolyp shyqty.
«Qazirgi kúni zańsyz ańshylyq jasaý faktisine baılanysty QR Qylmystyq kodeksiniń 337 baby boıynsha qylmystyq is qozǵaldy. Atylǵan eliktiń týshasy bıologııalyq saraptamaǵa jiberildi», - delingen baspasóz habarlamasynda.
