Almaty oblysynda «WhatsApp» arqyly jalǵan aqparat taratqan áıel ustaldy
TALDYQORǴAN.QazAqparat - Almaty oblysynda «WhatsApp» arqyly jalǵan aqparat taratqan áıel ustaldy. Kúdikti 28-jastaǵy Sarqan aýdanynyń turǵyny, dep habarlaıdy QazAqparat tilshisi.
Ol 10-shy qańtar kúni «WhatsApp» jelisi arqyly: «Sarqan qalasynda adamdy aıaýsyz óltiretin jaýyz paıda boldy. Polıtseıler barynsha saq bolýdy, úıden shyqpaýdy eskertip otyr. Keshe ózenniń janynda áıel men er adamdy, balany óltirip ketken. Bizge osy jaıly eskertip jáne tanystarymyzǵa da aıtýdy tapsyrdy» degen aqparat taratqan.
Tekserý barysynda aqparatttyń jalǵan ekeni anyqtaldy.
«Jedel-izdestirý sharasy barysynda jazbanyń avtory Sarqan aýdanynyń 28-jastaǵy turǵyny ekeni anyqtaldy. Áıel atalǵan habarlamany «WhatsApp» arqyly taratqanyn moıyndady. Biraq oǵan bul jaıly kúıeýi aýyzsha aıtqanyn aıtyp aqtaldy. Al joldasy bolsa adamdardy aıaýsyz óltirip jatyr degen áńgimeni dúkende turyp estip qalǵan eken», - dep málim etti oblystyq ІІD baspasóz qyzmeti.
Qazir shyndyqqa janaspaıtyn qaýesetpen turǵyndardy dúrliktirgen kúdikti áıeldiń ústinen qylmystyq is qozǵaldy. Tergeý QR QK 274 babyna sáıkes júrgizilip jatyr. Al 28 jastaǵy jergilikti turǵynǵa bultartpaý sharasy qoldanylyp, qolhatpen jiberildi.
