Almaty oblysynda úzdik sportshylarǵa páter berildi
TALDYQORǴAN.QazAqparat - Búgin Taldyqorǵanda sport kúnine arnalǵan saltanatty jıyn ótti. Shara barysynda sport salasynyń úzdikteri, ardagerleri men qyzmetkerlerine qurmet kórsetilip, alǵys hattarmen marapattaldy. Óńir basshysy Amandyq Batalov Rıo-de-Janeıroda ótken jazǵy Olımpıada jáne Paralımpıada júldegerleri Karına Gorıcheva men Raýshan Qoıshybaevaǵa páter kiltterin tabystady, dep habarlaıdy QazAqparat tilshisi.
Sporttaǵy joǵary kórsetkishteri úshin paýerlıftıngten Rıo-de-Janeıroda ótken Paralımpıada oıyndarynyń kúmis júldegeri Raýshan Qoıshybaevaǵa oblys ákimi Amandyq Batalov eki bólmeli páterdiń kiltin tabystady. Olımpıada oıyndarynda ziltemir kóterýden qola júldege ıe bolǵan Karına Gorıchevaǵa 1 bólmeli páter berildi. Aýyratletshiniń osy kúnderi Taıbeıde ótip jatqan jazǵy Ýnıversıada oıyndarynda el namysyn qorǵap jatqandyǵyn eskere kele, jańa páterdiń kilti sportshynyń anasy Elena Gorıchevaǵa tabystaldy. Sondaı-aq óńir basshysy oblysymyzda sport nysandaryn salý, materıaldyq-tehnıkalyq bazamen qamtamasyz etý jáne kúrdeli jóndeý jumystarynyń qarqyndy júrgizilip jatqandyǵyn ataı kele, jaqyn aralyqta Taldyqorǵanda 3 iri sporttyq nysannyń boı kóteretindigin tilge tıek etti. Olar: júzý jolaǵy 50 metr bolatyn júzý basseıni men sýǵa sekirýge arnalǵan 10 metrlik tuǵyry bar keshen, jabyq jeńil atletıka maneji jáne Qapshaǵaı men Taldyqorǵan qalalarynyń aralyǵynda salynatyn velotrek.Aıta keteıik, Almaty oblysynda aǵymdaǵy jyldyń ózinde halyqaralyq dárejedegi 12 sport sheberi, 78 sport sheberi, 471 sport sheberligine úmitker jáne 233 birinshi sanatty sportshylar tárbıelenip shyqty. Aldyńǵy qatarly 72 sportshy men 21 múmkindigi shekteýli sportshylarymyzǵa aı saıyn arnaıy stıpendııa qarastyrylǵan. Talǵar aýdanynda at sporty jáne ulttyq sport túrlerinen jáne Taldyqorǵan qalasynda shahmat pen ústel oıyndary túrlerinen balalar men jasóspirimderdiń mamandandyrylǵan sport mektepteri ashyldy.
