Almaty oblysynda úzdik mádenıet mekemesine kólik syıǵa tartyldy
TALDYQORǴAN. QazAqparat - Almaty oblysyndaǵy «Alataý áýenderi» kontserttik uıymy óńirdegi úzdik mádenıet mekemesi atanyp, ujymǵa «Kıa Rıo» avtokóliginiń kilti tabystaldy, dep habarlaıdy QazAqparat tilshisi.
Taldyqorǵandaǵy Bıken Rımova atyndaǵy drama teatrda ótken mádenıet salasy qyzmetkerleriniń kúnine arnalǵan saltanatty sharada oblys basshysy men qonaqtar aldymen teatr foıesine qoıylǵan óner kórmesimen tanysty. Munan soń shara sahnada jalǵasyp, shymyldyq belgili kúıshi Seken Turysbekovtiń dırıjerlyǵymen «Aq jaýyn» kamerlyq orkestri oryndaǵan «Kóńil tolqyny» kúıimen ashyldy.
Budan ári shara sala qyzmetkerlerin marapattaýmen jalǵasty. Jyl boıǵy tyndyrymdy jumystarynyń qorytyndysynda 14 nomınatsııa boıynsha úzdik mekemeler men úzdik mamandar anyqtalyp, olarǵa qurmet kórsetildi. Atap aıtqanda, «Úzdik mádenıet úıi» nomınatsııasynda Jambyl aýdandyq mádenıet úıi oq boıy ozyq shyqsa, Tekeli qalalyq kitaphanasy «Úzdik kitaphana» retinde marapattaldy. J.Jabaevtyń ádebı-memorıaldy mýzeıi «Úzdik mýzeı», Іle aýdanynyndaǵy úlgili «Elegııa» vokaldyq ansambli «Úzdik halyqtyq úlgili ataǵy bar ujym» atandy. Sol sııaqty Súıinbaı atyndaǵy Almaty oblystyq fılarmonııasy «Altynaı» memlekettik halyq bı ansambliniń balet ártisi Gúlnur Qarjaýbaeva úzdik bıshi dep tanylsa, fılarmonııanyń jeke daýystaǵy ánshileri Saıa Esengeldınova «Úzdik dástúrli ánshi», Aleksandra Revkova «úzdik ánshi» atalymyn ıelendi. M.Tólebaev atyndaǵy halyq aspaptary orkestriniń aspapshy ártisi Botagóz Dúngenbaeva «Úzdik aspapshy», talǵarlyq Saılaý Botabekov «Úzdik qolónershi», Almaty oblystyq halyq shyǵarmashylyǵy ortalyǵynyń ádiskeri Baǵdat Batyrov «Úzdik tehnıkalyq-jabdyqtaý qyzmetkeri», B.Rımova atyndaǵy Taldyqorǵan drama teatry ártisi Bazarbek Toqymtaev «Úzdik teatr ártisi», «Batyr babalar» mýzeıiniń meńgerýshisi Álim Orynbasar «Úzdik mýzeı qyzmetkeri», Taldyqorǵan qalalyq kitaphanasynyń qyzmetkeri Aıajan Qydyralınova «Úzdik kitaphana qyzmetkeri» retinde marapattaldy. Jeńimpazdarǵa nomınatsııa statýetkasy men arnaıy 100 myń teńgeniń sertıfıkaty berildi.
Óńirdiń úzdik mádenıet mekemesi atanǵan «Alataý áýenderi» kontserttik ujymy oblys ákiminiń qolynan «Kıa Rıa» avtokóliginiń kiltin aldy.
Sonymen qatar 30-dan astam azamatqa «Mádenıet salasynyń úzdigi» tós belgisi, Mádenıet jáne sport mınıstrliginiń jáne oblys ákiminiń qurmet gramotalary men alǵys hattary berildi.
Mádenıet ókilderiniń atynan B. Rımova atyndaǵy drama teatrynyń ártisi Rýslan Senkebaev sóz alyp, áriptesterine aq tilegin arnady. Shara merekelik kontsertpen aıaqtaldy.
