Almaty oblysynda úılerdi tonaǵan qylmystyq top ustaldy
TALDYQORǴAN.QazAqparat - Almaty oblysynyń Jambyl aýdanynda júrgizilgen arnaıy shara barysynda 4 adamnan quralǵan qylmystyq top qolǵa tústi, dep habarlaıdy QazAqparat tilshisi.
Almaty oblystyq Polıtsııa Departamenti baspasóz qyzmetiniń málimetinshe, olardyń Qarǵaly, Uzynaǵash jáne Qaınazar eldimekenderindegi úılerden aqsha, baǵaly zattardy, zergerlik buıymdar men turmystyq tehnıkalardy urlaǵany belgili boldy. Sýbarý kóligine mingen qylmystyq top ókilderiniń sońǵy eki aı ishinde 16 urlyq deregine qatysy bary dáleldendi. Olardy ustaý kezinde qoldy bolǵan zergerlik buıymdar men uıaly telefondar tabylyp, is materıaldaryna aıǵaqzat retinde tirkeldi.
«Ustalǵan kúdiktilerdiń eń úlkeni 1988 jylǵy bolsa, kishisi kámelettik jasqa bıyl tolǵan. Olar buǵan deıin sottalmaǵany anyqtaldy. Atalǵan derekter boıynsha QR Qylmystyq kodeksiniń 188-babyna sáıkes sotqa deıingi tergeý amaldary júrgizilip jatyr. Zardap shegýshilerge keltirilgen materıaldyq shyǵyn eseptelýde»,- dep tolyqtyrdy oblystyq polıtsııanyń resmı ókili Serik Úpıev.
Kúdiktiler aýdandyq sottyń sheshimimen qamaqqa alyndy. Tergeý barysynda tártip saqshylary olardyń budan ózge de qylmystarǵa qatysy baryn anyqtaıtyn bolady. Top múshelerine tıesili avtokólik tıisti avtoturaqqa qoıyldy.
