Almaty oblysynda úıinen qashyp ketken múgedek bala tabyldy
TALDYQORǴAN. QazAqparat - Almaty oblysynyń polıtsııa qyzmetkerleri Jambyl aýdanynda tórt kún buryn iz-túzsiz joǵalǵan kámeletke tolmaǵan jetkinshekti tapty, dep habarlaıdy QazAqparat tilshisi.
16 jasar bozbalanyń anasy uly joǵalyp ketkennen keıin birden polıtsııaǵa onyń múgedektigi bar ekenin jáne medıtsınalyq esepte turǵanyn aıtyp júgingen.
Dabyl boıynsha kóterilgen qyzmetkerler ıývenaldy polıtsııa ınspektorlarymen birlesip, aýqymdy izdeý jumystaryn bastaǵan. Habarsyz ketken balanyń fotosýreti bar baǵdarlar jaqyn mańda ornalasqan barlyq polıtsııa bólimshelerine jiberilgen.
«Іzdeý kámeletke tolmaǵan balanyń anasy eskertken onyń psıhıkalyq jaı-kúıine saı júrgizildi. Turǵylyqty Qaınazar kentin tolyǵymen sholyp shyqqan qyzmetkerler volonterlermen birlese otyryp, izdeý sharalaryn kórshi eldi mekenderde de jalǵastyrdy. Nátıjesinde tórtinshi táýlikte biz kórshi Qarasaı aýdanynda ornalasqan Shamalǵan aýylynan kámeletke tolmaǵan balanyń ornalasqan jerin anyqtadyq. Bala birden aýdandyq bólimge jetkizilip, anasyna tapsyryldy», - deıdi Jambyl aýdandyq polıtsııa bóliminiń bastyǵy Ashat Tegenbaev.
Kámeletke tolmaǵan jetkinshektiń ishinara úıden qashyp ketetindigi anyqtaldy. Onyń múgedektigin eskere otyryp, jalǵyzbasty anaǵa aýyzsha eskertý jasaldy.
