Almaty oblysynda úıi órtengen jalǵyz basty ana dalada qaldy
TALDYQORǴAN. QazAqparat - Taldyqorǵan qalasyna qarasty Qyzyl tas saıajaıynda turatyn jalǵyz basty ana Rıta Bekenovanyń úıi órtenip, eki balasymen jáne 80 jastaǵy anasymen dalada qaldy. Eki aptadan beri olar kórshileriniń úıin panalap keledi, dep habarlaıdy QazAqparat tilshisi.
Naýryzdyń 25-nen 26-na qaraǵan túni bolǵan oqıǵany Rıta úreımen eske alady. Ol qyzyl jalynnyń arasynan eki kishkentaı qyzyn áreń alyp shyǵarǵanyn aıtady. Al órt elektr symdarynyń tuıyqtalýynan bolýy múmkin.
«Birinshi jaryq óship qaldy, keıinnen ıis keldi, dálizdiń esigin ashyp qalsam, ot laýlap jatyr. Tún ortasynda eki qyzymdy áreń alyp shyqtym. Órt sóndirýshiler bir jarym saǵattan keıin keldi. Tym bolmaǵanda jarty saǵattyń ishinde kelgende, úıimdi aman alyp qalýǵa bolar edi. Negizi órt elektr symdarynan shyqty dep oılaımyn. Toq týra aǵashqa ilinip turatyn, elektr mamandaryna birneshe ret aıttym, myna aǵashty kesip berińizdershi, toqqa kedergi jasap tur dep, sózime qulaq aspady. Qazir kórshilerimniń úıinde júrmiz. Bizde, bilesizder, saıajaıda sý joq. Sol túni qyzyl jalyndy óshiretin sý da bolmady. Artynan órt sóndirýshiler sýdyń bolmaǵany da durys boldy dep aıtty. Sebebi, órt elektr symdarynan shyqqandyqtan, biz sý quıǵanda ózimizdi toq soǵar ma edi. Áıteýir aman qalǵanymyzǵa shúkirshilik etip otyrmyz», - deıdi baspanasy órtenip ketken Rıta Bekenova. 
Egde jastaǵy sheshesin qoltyqtap, eki balasyn jetektep júrgen jalǵyz basty ana endi qaıda baryp ómir súretinin bilmeıdi. Tyǵyryqqa tirelgen otbasy qaıyrymdy jandardan kómek suraıdy. Eger qol-ushyn berýge nıetti jandar bolsa, myna nomerlerge 8 777 055 02 74, 8 747 295 2036 habarlasýlaryńyzǵa bolady.
