Almaty oblysynda ustalǵan radıkaldar 11 qyrkúıekte AQSh-ta oryn alǵan teraktini qaıtalamaq bolǵan - UQK
ASTANA. QazAqparat - Almaty oblysynda ustalǵan radıkaldar ushaqty aıdap áketip, 2001 jyly 11 qyrkúıekte AQSh-ta oryn alǵan terrorıstik aktini qaıtalamaq bolǵan. Bul týraly QR Ulttyq qaýipsizdik komıtetiniń baspasóz qyzmetinen habarlandy.
«18 tamyzda Qyrǵyzstannyń bir azamaty men buǵan deıin sotty bolǵan eki qazaqstandyq ustalǵan bolatyn. Olar qoǵamda úlken úreı týdyrý maqsatynda jergilikti jerde jurt jappaı jınalatyn oryndarda terakti jasaý joldaryn qarastyrǵan. Budan bólek, Taldyqorǵan áýejaıynda barlaý jasap, azamattyq nemese áskerı ushaqtardy aıdap áketip, 2001 jyly 11 qyrkúıekte AQSh-ta oryn alǵan terrorıstik aktige uqsas shabýyl jasaý joldaryn zerttegen», - delingen baspasóz baıanynda.
Ustalǵandar osyndaı teraktini jasamas buryn beınerolık túsirip, onda ózderiniń shabýyly týraly túsinik berip, muny ınternetke ornalastyrýdy da josparlaǵan. Budan bólek, atys qarý-jaraǵy men oq-dáriler satyp alý úshin sharýa qojalyqtarynyń jáne shaǵyn nesıe uıymdarynyń basshylaryna qaraqshylyq shabýyl jasaýǵa da daıyndalǵan.
Eske sala ketsek, buǵan deıin habarlanǵanyndaı, 18 tamyzda Almaty oblysynda arnaıy operatsııa nátıjesinde tórt adamnan turatyn terrorıstik top quryqtaldy. Olarǵa respýblıka aýmaǵynda birqatar terrorıstik aktiler josparlaǵan degen kúdik keltirilýde. Qazaqstan jáne Qyrǵyzstan azamattary bolyp tabylatyn toptan qoldan jasalatyn jarylys qurylǵylaryna paıdalanylatyn komponentter, dinı-ekstremıstik baǵyttaǵy materıaldar tabyldy. Olar bul zattardy ózderi turyp jatqan jerinde qupııa oryndarǵa tyǵyp tastaǵan.
Al UQK tóraǵasy Vladımır Jumaqanov ustalǵandardyń salafızm aǵymyn ustanatyndar ekenin málimdegen bolatyn. Aıta keterligi, olardyń buǵan deıin Aqtóbe jáne Almaty qalasynda jasalǵan terrorıstik aktilerge qatysy joq bolyp shyqty.
