Almaty oblysynda úsh júzdeı qoı urlaǵan kúdikti ustaldy
Polıtsııanyń aqparatyna sáıkes, kúdikti 274 qoıdy bir kúnde urlamaǵan. Ol qylmysyn jarty aıdyń ishinde júzege asyrǵan
3 qarasha kúni Jambyl aýdanynyń polıtsııasyna aýdandaǵy sharýa qojalyǵynan 274 qoıdyń urlanǵany týraly habar túsken. Tártip saqshylary qylmysqa qatysy bar tulǵalardy anyqtaýǵa baǵyttalǵan jedel izdestirý sharalary barysynda bir táýlik ishinde kúdikti azamatty anyqtady.
«Aýdandyq polıtseıler júrgizgen anyqtaý sharalary barysynda 28 jastaǵy aýyl turǵynynyń osy qylmysqa qatysy bary anyqtaldy. Onyń úıindegi qoradan qoılardyń bir bóligi tárkilenip, ıesine qaıtaryldy. Derek boıynsha sotqa deıingi tergeý amaldary jalǵasýda. Tártip saqshylary kúdiktiniń sybaılastaryn anyqtaıtyn bolady»,- dep atap ótti oblystyq PD baspasóz qyzmetinen.
Aldyn ala tergeý barysynda zardap shegýshige 8 mıllıonnan astam teńge shyǵyn keltirilgeni anyqtaldy. Tergeý barysynda qoıshynyń da atalǵan mal urlyǵyna bar-joǵy anyqtalatyn bolady.
Polıtsııa taratqan aqparat boıynsha, mal ıesi men malshy arasynda zańdy kelisim bolmaǵan jaǵdaıda, jaýapkershilik bolmaýdan túrli zańbuzýshylyqtar oryn alýy múmkin. Osy maqsatta oblys aýmaǵynda tártip saqshylary usynǵan «Malshy – mal ıesi – atqarýshy organ» atty áleýmettik jobasy jumys isteıdi. Atalǵan jobanyń basty maqsaty – mal ıesi men malshynyń jaýapkershiligin arttyrý jáne barymtashylar úshin ońaı olja bolatyn qaraýsyz maldy baqtashysyz qaldyrmaý. Osy kezge deıin oblysta bes myńǵa jýyq adam baǵdarlama boıynsha kelisimge kelip, óz múlkiniń amandyǵyn qamtamasyz etti.
«Malshy – mal ıesi – atqarýshy organ» baǵdarlamasy qabyldanǵaly jaıylymdaǵy maldyń joǵalý deregi edáýir azaıdy. Salystyrmaly túrde, 2017 jyly 460-qa jýyq derek tirkelse, bıyl jaıylymnan joǵalǵan mal boıynsha 148 fakti oryn aldy.
Aıta keteıik, oblysta bıyl tártip saqshylary 59 barymtashylar tobyn quryqtap, olardyń 131 qylmysqa qatysy baryn dáleldegen. 700-ge jýyq qoldy bolǵan maldy ıelerine qaıtarǵan, 80 mıllıon teńgege jýyq materıaldyq shyǵyn óndirilgen.
