Almaty oblysynda úsh kúnde júzge jýyq atys qarýy tárkilendi
TALDYQORǴAN. QazAqparat - Almaty oblysynda Azamattyq qarý aınalymyna baqylaýdy kúsheıtý maqsatynda «Qarý» aldyn alý sharasy ótýde. Úsh kún ishinde júzge tarta atys qarýlary tárkilendi. Polıtsııa qyzmetkerleri tirkelgen qarý ıelerin tekserip, zańsyz saqtaý faktilerin anyqtady, dep habarlaıdy QazAqparat tilshisi.
«Qarý» aldyn alý sharasy barysynda aınalymnan 97 qarý alyndy, olardyń 8-i zańsyz aınalymdaǵy bolyp otyr. Tirkelgen qarýy bar myńǵa tarta azamat tekserilip, saqtaý, tirkeý jáne qaıta tirkeý talaptaryn buzǵan 92 adam jaýapkershilikke tartyldy.
Sonymen qatar, krımınaldyq polıtsııa qyzmetkerleri ústimizdegi jyldyń basynan beri tirkelgen 12 qarýdy tekserý barysynda, olardyń urlanǵanyna qatysty 3 faktini anyqtady», - delingen Almaty oblystyq Іshki ister departamentiniń baspasóz qyzmeti taratqan málimette.
Aıta keterligi, polıtsııa qyzmetkerleri profılaktıkalyq shara barysynda 21 jastaǵy azamatty da quryqtaǵan. Buǵan deıin oǵan qarý urlady degen kúdikpen Іle aýdannyń quzyrly organy izdeý jarııalanǵan.
