Almaty oblysynda úsh kún buryn joǵalǵan oqýshy tabyldy
TALDYQORǴAN. QazAqparat - Almaty oblysynyń polıtseıleri úsh kún buryn iz-túzsiz joǵalyp ketken 10-synyp oqýshysyn izdep tapty, dep habarlaıdy QazAqparat tilshisi.
Almaty oblystyq Polıtsııa Departamenti baspasóz qyzmetiniń málimetinshe,
maýsymnyń 28-i kúni saǵat 15:45 shamasynda Іle aýdanynyń kezekshi bólimine Kókterek aýylynyń 42 jastaǵy turǵyny shaǵymdanǵan. Ol 16 jastaǵy ulynyń 26 maýsym kúni ákesi ekeýiniń arasyndaǵy janjaldan keıin úıden shyǵyp, joǵalyp ketkenin jetkizgen. Sol ýaqyttan beri ol ulynan esh habar ala almaǵan. «Atalǵan derek tirkelip, polıtseıler birden izdeý jumystaryna kiristi.
Bir táýlik ishinde tártip saqshylary izdestirilip jatqan bozbalanyń týystary arqyly onyń kórshi kenttegi ornalasqan jerin, ıaǵnı qurylysta jumys istep júrgen ornyn anyqtady. Oqýshynyń telefon arqyly anasyna habarlama jibergeni belgili boldy. Alaıda anasy ol habarlamany oqymaǵan. Tártip saqshylary tárbıe-túsindirý jumystaryn júrgizgennen keıin, ony ata-anasyna tapsyrdy»,- delingen atalǵan vedomstvonyń baspasóz qyzmeti taratqan habarlamada.
