Almaty oblysynda úsh aýysymdy mektep máselesi ózekti bolyp tur
TALDYQORǴAN. QazAqparat - Búginde Almaty oblysynda úsh aýysymdy 27 mektep bar bolsa, bıylǵy oqý jylynda olardyń qatary 3 mektepke azaıady, dep habarlaıdy QazAqparat 24.kz-ke silteme jasap.
Úsh aýysymdy mektepterdiń máselesi tym baıaý sheshilýde. Qazir óńirde 22 bilim nysanynyń qurylysy júrip jatyr. Sonyń tórteýi 3 aýysymdy mektepterdi joıý maqsatynda salynýda. Al 30 bilim nysany kúrdeli jóndeýden ótip jatyr.
«Sonyń ishinde bir mektepte qazir tolyǵymen kúrdeli jóndeý jumystary aıaqtalyp, paıdalanýǵa berildi. Ol - Panfılov aýdanyndaǵy Lesnovka aýylyndaǵy Raqyshev atyndaǵy mektep. Qalǵan nysandarymyz 1 qyrkúıekke deıin berilip, balalar 1 qyrkúıekti jańa, taza, kúrdeli jóndeýden ótken ǵımaratta qarsy alady»,-deıdi oblystyq bilim basqarmasynyń basshysy Gúlsara Isaǵulova.
Turǵyndary kóbeıip, demografııalyq jaǵdaıy jylma-jyl artyp kele jatqan Taldyqorǵan qalasynda mektepterdiń azdyǵy baıqalady. Sondyqtan bıyl árqaısysy 1200 oryndyq 2 mekteptiń qurylysy qatar aıaqtalǵaly otyr. Biri jańa yqsham aýdannan boı kóterse, ekinshisi shahardyń shetkeri aýmaǵyndaǵy eldimeken balalary úshin óte qolaıly jerden oryn tepken. Jer kólemi 3 gektardan asatyn mektep qalanyń soltústik-batys aımaǵynda tur. Munda 175 adam eńbek etýde. Qurylys materıaldarynyń barlyǵy Qazaqstandiki.
«Jumystyń 95 paıyzy bitip tur. Іshki bólikti árleýdemiz. Qural-jabdyqtyń barlyǵyn qoıyp jatyrmyz. 20 tamyz kúni tapsyramyz mektepti»,-deıdi qurylys jobasynyń jetekshisi Qanat Áýtálipov.
Sonymen, oblys ortalyǵyndaǵy bilim shańyraqtarynyń sany 26-ǵa jetkeli tur. Onda 30 myńnan astam shákirt oqıtyn bolady. Oblysta bıyldan bastap aldaǵy 5 jyldy qamtıtyn jospar bar. Ol boıynsha 53 mektep qajettilikke qaraı kúrdeli jóndeýden ótedi nemese qosymsha ǵımarattarǵa ıe bolady. Qazir 5 mekteptiń jobalyq smetalyq qujattamalary jasalýda.
