Almaty oblysynda úsh aýysymda oqytatyn 38 mektep bar – Amandyq Batalov

TALDYQORǴAN. QazAqparat - Almaty oblysynda úsh aýysymda oqytatyn 38 mektep bar. Bul jóninde dál qazir halyq aldynda esep berip jatqan óńir basshysy Amandyq Batalov málimdedi, dep habarlaıdy QazAqparat tilshisi.

«Bıyl 13 mektep salamyz. Onyń ishindegi 8 mektep úsh aýysymda oqytatyn bilim shańyraqtarynyń máselesin sheshýge baǵyttalǵan. Jalpy bul maqsatqa 11,2 mlrd teńge qarastyrylǵan», - dedi A. Batalov.

Oblys ákiminiń málimetinshe, úsh aýysymda oqytatyn 8 mektep Jambyl aýdanynyń Jaısan, Qasymbek aýyldarynda, Іle aýdanyndaǵy Túımebaev, Qaraoı, Japek batyr, Qosózen eldi mekenderindegi jáne Qarasaı aýdanyna qarasty Shamalǵanda ornalasqan. Biraq munymen másele áli de ózektiligin joǵaltpaıdy. Sondyqtan Almaty oblysynda jalpy quny 10,3 mlrd teńgege baǵalanǵan taǵy 6 mekteptiń qurylysyn bastaý qajet. Bir ǵana Eńbekshiqazaq aýdanynyń bes aýylyna Tashkensaz, Almalybaq, Úshterek, Іrgelı, Batan aýyldarymen Qarasaıdaǵy Shamalǵan stantsııasynda mektep qurylysyn bastaý qajettiligi týyndap tur.

Almaty oblysynyń ákimi Amandyq Batalovtyń sózinshe, sońǵy bes jyldyń ishinde Jetisý jerinde 75 jańa mektep salynǵan. Onyń ishinde 30 myń oryndyq 55 mektep úsh aýysym máselesin sheshýge baǵyttalǵan.

Biraq Almaty oblysynda jyl saıyn halyq sany artýda.

«Máselen byltyr birinshi synypqa 48 myń bala bardy», - dedi oblys ákimi.