Almaty oblysynda usaq sharýashylyqtar servıstik-daıyndaý arqyly irilenip keledi
TALDYQORǴAN. QazAqparat - Almaty oblysynda jer kólemi az, tehnıkasy joq sharýalar servıstik-daıyndaý ortalyqtary negizinde birigip, irilene bastady. Solardyń biri Kóksý aýdanynda 12 sharýashylyqty biriktirgen «Alan» servıstik ortalyǵy, dep habarlaıdy QazAqparat tilshisi.
«Alan» servıstik-daıyndaý ortalyǵy 2015 jyly qant qyzylshasy baǵytynda qurylǵan. Negizgi quryltaıshysy Kóksý aýdany, Musabek aýyldyq okrýgine qarasty «Keń dala» sharýa qojalyǵy. Ortalyqqa lızıng arqyly 141 mln teńgeniń 28 dana tehnıkasy alyndy. Byltyr servıstik-daıyndaý ortalyǵy arqyly birikken dıqandar 7,5 myń tonna tátti túbir ótkizgen. Bıyl olar 10 myń tonnaǵa jýyq qant qyzylshasyn alýdy josparlap otyr.
«Keń dala» sharýa qojalyǵynyń jetekshisi Qalıbek Alpysbaevtyń aıtýynsha, keıbir tájirbıeli alqaptardyń ár gektarynan 1000 tsentnerge deıin ónim alýǵa bolady. Ónimdiliktiń artýyna jerdi óńdeýdiń zamanaýı tehnologııalary men jańa tehnıka, memleketten berilip otyrǵan sýbsıdııa múmkindik berip otyr.
