Almaty oblysynda urylarǵa 23 jastaǵy boıjetken baǵyt siltep otyrǵan
TALDYQORǴAN. QazAqparat - Almaty oblysynyń polıtsııasy jeke turǵyn úı men páterlerdi tonaýmen aınalysyp júrgen kúdiktilerdi ustady. Olardyń arasynda 23 jastaǵy boıjetken de bar, dep habarlaıdy QazAqparat oblystyq ІІD baspasóz qyzmetine silteme jasap.
«Qylmystyq top úsh adamnan turady, aralarynda 23 jastaǵy boıjetken de bar. Kúdiktiler Jambyl aýdany Uzynaǵash aýylynda kezekti qylmys ústinde qolǵa tústi. Olar úıden úsh qarý, altyn buıymdar, baǵaly ton men iri somada aqsha alyp ketpek bolǵan», - delingen baspasóz baıanynda.
ІІD málimetine qaraǵanda, kúdiktiler Almaty qalasy men Almaty oblysynyń turǵyndary. Al sońǵy tonaý áreketterinen olardyń keltirgen zalaly 2 mıllıon teńgeni quraǵan. Qylmystyq tergeý materıaldaryna zattaı aıǵaq retinde ustalǵandardan tárkilengen qarý men qymbat kıim alynyp otyr.
Budan bólek, oblystyq krımınaldyq polıtsııa basqarmasy urylar tobynyń óńirdegi basqa da qylmystarǵa qatysy baryn joqqa shyǵarmaıdy. Osyǵan baılanysty polıtsııa tarapynan kúdiktiler áreketine uqsas basqa da qylmystardy tekserý jalǵasýda.
«Ustalǵandardyń úsheýi de qazir qamaýda. Anyqtalǵan faktiler boıynsha sotqa deıingi tergeý júrip jatyr. Ustalǵan boıjetken urylar tobynda qajetti aqparattar tabýmen aınalysyp, úpteıtin úılerge baǵyt berýshi bolyp otyrǵan. Jalpy tergeý barysynda urylardyń tobyndaǵy árbiriniń atqarǵan róli tekserilip, anyqtalatyn bolady», - delingen baspasóz baıanynda.
