Almaty oblysynda urlanǵan bir úıir jylqy soıylǵaly jatqan jerinen tabyldy
TALDYQORǴAN. QazAqparat - Almaty oblysynyń polıtseıleri urlanǵan bir úıir asyl tuqymdy jylqyny ıesine qaıtardy. Barymtashylar sáıgúlikterdi Eńbekshiqazaq aýdanynyń Teskensý aýylynan aıdap áketken, - dep habarlaıdy QazAqaparat tilshisi.
Jedel izdestirý barysynda tártip saqshylary urlanǵan úıirdiń izine túsip, jylqylardy baýyzdaǵaly jatqan jerinen alyp qalǵan. Tulparlar sol aýdanǵa qarasty Qazaqstan aýylynyń mańynan tabyldy. Anyqtalǵandaı barymtashy jylqylardy alyp-satarǵa ótkizip úlgergen. Óz kezeginde qasapshylar maldy soıýǵa daıyndalyp jatqany belgili boldy.
Aıta ketý kerek, jylqy ıesi joǵalǵan malyn birneshe mıllıonǵa baǵalaǵan bolatyn.
«Mal urlaý faktisi boıynsha QR QK 188-baby, 3-bóligi boıynsha sotqa deıingi tergeý jumystary bastaldy. 37 jastaǵy jergilikti turǵyn kúdikti retinde qamaýǵa alyndy», - dep málimdedi oblystyq polıtsııa departamentiniń baspasóz qyzmeti.
Sondaı-aq, urlanǵan jylqylardy satyp alǵan saýdager de qylmystyq jaýapqa tartylýy múmkin. Almaty oblysynda polıtseıler jyl basynan beri 1000 basqa jýyq maldy izdep taýyp, ıelerine qaıtarǵan.
