Almaty oblysynda úlgili polıtseılerdiń ata-analaryna alǵys jarııalandy
TALDYQORǴAN. QazAqparat - Qazaqstan polıtsııasy kúnin merekeleýge baılanysty Іshki ister mınıstriniń buıryǵymen jáne Polıtsııa departamentiniń buıryǵymen qyzmettik mindetterin adal atqaryp, kásibılik tanytqan, qyzmette joǵary kórsetkishter kórsetken Almaty oblysynyń 650-den astam tártip saqshysy marapattaldy. Sondaı-aq polıtseılerdiń 44 ata-anasyna alǵys hat tabystaldy, dep habarlaıdy QazAqparat tilshisi.
Búgin 23-maýsym kúni Polıtsııa departamentinde onlaın rejıminde saltanatty is-shara ótti. Atalǵan is-sharaǵa Almaty oblysy Polıtsııa departamentiniń bastyǵy, polıtsııa general-maıory Serik Kýdebaev, ardagerler keńesiniń ókilderi, Departament qyzmetteri men bólimsheleriniń basshylyǵy men jeke quramy qatysty.
«Almaty oblysynyń Polıtsııa departamenti-joǵary dárejeli kásibı mamandar jumys isteıtin kadrlyq áleýeti joǵary jáne zamanaýı tehnıkalyq bazasy bar qýatty polıtsııa mekeni. Olardyń jetistiginiń basty kepili- urpaq sabaqtastyǵy jınaqtaǵan baǵa jetpes tájirıbe. Qazirgi ýaqytta jıyrmaǵa jýyq qyzmetker nagradaǵa ıe boldy. Qyzmettik boryshyn atqarý kezindegi adal eńbegi, erligi men batyldyǵy úshin 4 qyzmetker «Erligi úshin« memlekettik nagradasymen marapattaldy», - dep atap ótti Almaty oblysy Polıtsııa departamentiniń bastyǵy, polıtsııa general-maıory Serik Kýdebaev.
Sonymen qatar, 61 qyzmetker alǵys hatpen, 63 tártip saqshysy gramotalarmen marapattaldy, 18 polıtsııa qyzmetkerine alǵys jarııalandy, sondaı-aq 428 úmitker ózderiniń alǵashqy arnaıy ofıtserlik ataqtaryn aldy. Sondaı-aq, 7 qyzmetker kezekti áskerı ataǵyn merziminen buryn aldy. Budan ózge, qyzmette jaqsy kórsetkishter kórsetkeni úshin 30-dan astam qyzmetkerdiń buryn jarııalanǵan jazalary alynyp tastaldy, 1090-nan astam qyzmetker merekelik aqshalaı syıaqy ıelendi.
