Almaty oblysynda ýchaskelik polıtseı jarylystyń aldyn aldy
TALDYQORǴAN.QazAqparat - Almaty oblysynda aýyldyq ýchaskelik polıtsııa qyzmetkeri órtenip jatqan páterden áıel adamdy qutqaryp, órttiń odan ári taraýyna jol bermedi, dep habarlaıdy QazAqparat tilshisi.
Atalǵan derek Tekeli qalasyna qarasty Rýdnıchnyı aýylynda boldy. 6 qarasha kúni ýchaskelik polıtsııa ınspektory polıtsııa kapıtany Erbol Amanbaevqa kóp páterli úılerdiń birinde órt shyqty degen habarlama túsken. Oqıǵa ornyna shuǵyl kelgen polıtseı órt sóndirýshilerdi kútpeı, páter esigin buzyp kirgen. Oılanbastan tútinge tunshyǵyp qalǵan 59 jastaǵy páter ıesin dalaǵa alyp shyqqan. Órtenip jatqan páterdegi gaz toly ballondy dalaǵa shyǵaryp, jarylystyń aldyn alǵan.
«Páter ıesi Roza apaı órtti ózi sóndirýge tyrysqan tárizdi. Óıtkeni, as úı men jýynatyn bólme arasynda dálizde jatyr eken. Men ony tez arada qaýipsiz jerge apardym. Men júgirip kirdim de, ystyq gaz balondy ajyratýǵa tyrystym. Bolmaǵan soń, shlangty pyshaqpen kesip, páterden shyǵardym. Qolymdy da ońdyrmaı kúıdirip aldym. Órt asúıden shyqqan sııaqty, sebebi tońazytqysh, jıhazdar men qabyrǵalar órtenip jatyr eken. Jýynatyn bólmeden sý tasyp, qolymnan kelgenshe shashyp, órtti óshirdim», - dedi Erbol Amanbaev.
Rýdnıchnyı aýylynyń 1000-nan astam turǵyny bar. Taý eteginde ornalasqan aýyldyń óz mektebi, kúndizgi medıtsınalyq aýrýhanasy, aýyl ákimdigi bar. Degenmen, órt shyqqan jaǵdaıda aýyl turǵyndary 50-60 shaqyrym qashyqtyqta ornalasqan Tekeli qalasynan kómek kútedi.
«Aýyl taýly jerde ornalasqandyqtan, oǵan jetý úshin biraz ýaqyt qajet. Osyny eskere otyryp, ýchaskelik polıtsııa qyzmetkeriniń shuǵyl áreketi men órt sóndirý kezindegi sheberligin erekshe atap ótýge turarlyq. Órtti sóndirýde kapıtan Erbol Amanbaev sol qolyn kúıdirip alǵanymen, medıtsınalyq kómek kórsetkennen keıin qyzmetine qaıta oraldy. Qazir ádettegideı jumysyn jalǵastyrýda», - dep tolyqtyrdy Almaty oblysy PD baspasóz qyzmeti.
