Almaty oblysynda TJ rejımin buzǵan azamat ustaldy
TALDYQORǴAN. QazAqparat-Almaty oblysynda Tótenshe jaǵdaı rejımin buzǵan azamat ustaldy, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, áleýmettik jeli arqyly Almaty oblysy Polıtsııa departamentiniń bastyǵyna Taldyqorǵan qalasynyń 37 jastaǵy turǵynynyń tótenshe jaǵdaı rejımin saqtamaǵany týraly jasyryn habarlama kelip túsken.
«Áli kúnge deıin azamattar qaýipsizdik sharalaryn qoldanbaı, blok-beketterden túrli árekettermen zańsyz ótýge talpynýda. Bul áıel de dál osyndaı adamdardyń qatarynda. Onyń blok-beketter arqyly Almatydan Taldyqorǵanǵa ótý áreketteri sátsiz aıaqtalǵannan keıin, onyń jekemenshik taksı qyzmetimen beketterdi aınala ótý arqyly tótenshe jaǵdaı rejımin buza otyryp, Taldyqorǵan qalasyna kelgendigi anyqtaldy. Qazirgi ýaqytta tártip buzýshy ustalyp, 14 kúndik karantınge ornalastyryldy»,-dedi Almaty oblysy Polıtsııa departamenti bastyǵynyń orynbasary polıtsııa polkovnıgi Bolat Teńizbaev.
QR ÁQBtK-niń 476-babynyń 1-tarmaǵyna sáıkes jasalǵan ákimshilik materıal sottyń qaraýyna jiberildi. Ony tasymaldaǵan taksı júrgizýshilerin anyqtaý jáne jaýapqa tartý boıynsha sharalar qabyldanýda.
«Sonymen qatar tótenshe jaǵdaı rejımin buzǵany úshin QR ÁQBtK-niń 476-babyna sáıkes, ıaǵnı tótenshe jaǵdaıdyń jarııalanýyna baılanysty memlekettik organ belgilegen rejımdi buzǵany nemese talaptardy oryndamaǵany úshin, sondaı-aq jergilikti jerdiń komendantynyń zańdy buıryqtary men ókimderin oryndamaǵany úshin, eger bul áreketterde (áreketsizdikterde) qylmystyq jaza qoldanylatyn áreket belgileri bolmasa, eskertý nemese on aılyq eseptik kórsetkish mólsherinde aıyppul salý ne on bes táýlikke deıingi merzimge ákimshilik qamaýǵa alý jazasy qoldanylýy múmkin. Sondaı-aq tótenshe jaǵdaı jarııalanǵan jerde QR QK 379-babyna sáıkes bılik ókiline baǵynbaǵan azamattarǵa eki myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty júz saǵatqa deıingi merzimge qoǵamdyq jumystarǵa tartýǵa, ne eki jylǵa deıingi merzimge bas bostandyǵyn shekteýge, sondaı-aq osy merzimge bas bostandyǵynan aıyrý jazasy qarastyrylǵan. Ózińizdi jáne jaqyndaryńyzdy saqtańyzdar!»,-dep tolyqtyrdy polıtsııa polkovnıgi Bolat Teńizbaev.
