Almaty oblysynda týysyn óltirip, joldyń boıyna tastap ketken kúdikti ustaldy
TALDYQORǴAN. QazAqparat - Almaty oblysynyń polıtseıleri Nur-Sultan qalasy turǵynynyń ólimine qatysty qylmysty ashty, dep habarlaıdy, QazAqparat tilshisi.
Talǵar aýdanynyń turǵyny jamaǵaıynyn óltirip, «Alataý-Tuzdybastaý» tas jolynyń mańyna qaldyryp ketken. Oqıǵa 23 qarasha kúni Talǵar aýdanynda tirkelgen. Jergilikti turǵyndar 31 jastaǵy azamattyń azaptap óltirilgen múrdesin joldyń boıynan taýyp alǵan.
Tártip saqshylary adam ólimi boıynsha qylmystyq is qozǵap, jedel izdestirý sharalaryna kirisedi. «Adam óltirdi» degen kúdikpen Talǵar aýdanynyń 43 jastaǵy turǵynyn ustaıdy. Ol mert bolǵan jigittiń alys týysy bolyp shyqty.
Polıtsııa departamentiniń baspasóz qyzmetiniń málimetinshe, qazirgi tańda kúdikti ustalyp, ýaqytsha ustaý ızolıatoryna qamaldy. QR QK-niń 99-baby boıynsha sotqa deıingi tergeý jumystary bastaldy. Aıǵaq zat retinde pyshaq pen temir qubyr tárkilenip otyr.
«Tergeý barysynda mundaı jaýyzdyqqa ne túrtki bolǵanyn polıtsııa anyqtaı jatar, ázirshe is oblystyq polıtsııa departamentiniń qatań baqylaýyna alyndy», - dep tolyqtyrdy departament ókili.
