Almaty oblysynda týystar arasyndaǵy janjal adam ólimimen aıaqtaldy
TALDYQORǴAN.QazAqparat - Almaty oblysynyń Talǵar aýdanynda týystar arasyndaǵy túsinbeýshilik adam ólimimen aıaqtaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 16 aqpan kúni Talǵar aýdanynyń polıtsııa bólimine Tuzdybastaý aýylyndaǵy janar-jaǵarmaı beketi aýmaǵynda er adamnyń máıiti tabylǵany týraly habar túsken. Oqıǵa ornyna shuǵyl jetken tártip saqshylary qaıtys bolǵan adamnyń 48 jastaǵy Baıbulaq aýylynyń turǵyny ekenin anyqtaǵan.
«Zorlyqpen óltirý belgileri bar er adamnyń máıiti tabyldy. Osyǵan oraı, QR Qylmystyq kodeksiniń 99-babyna sáıkes adam óltirý deregi boıynsha qylmystyq is qozǵaldy. Qylmysqa qatysy bar kúdiktini jedel anyqtaý sharalary barysynda 29 jastaǵy jigit ustaldy. Sotqa deıingi tergeý amaldary júrgizilýde. Ózge aqparat tergeý qupııalylyǵyna baılanysty taratylmaıdy»,- dedi Talǵar aýdany Polıtsııa basqarmasynyń bastyǵy Janbolat Zııadın.
Tergeý barysynda kúdikti qylmys jasaǵanyn tolyǵymen moıyndaǵan. Onyń qaıtys bolǵan er adamǵa jaqyn týys ekeni anyqtaldy. Kóp ýaqytqa sozylǵan týystar arasyndaǵy kıkiljiń osy qylmysqa ákep soqqan.
«Tergeý barysynda 1992 jyly týǵan jigittiń nege qylmysqa barǵany anyqtalady. Týysymen sózge kelispeı qalǵan ol ashýǵa boı aldyryp, qolyndaǵy pyshaqpen dene jaraqatyn salǵany belgili boldy. Іs boıynsha tıisti saraptamalar taǵaıyndaldy. Kúdikti ýaqytsha ustaý ızolıatoryna qamaýǵa alyndy»,- dep tolyqtyrdy Janbolat Zııadın.
