Almaty oblysynda túıe urlady degen kúdikpen qojalyq basshysy ustaldy
TALDYQORǴAN. QazAqparat - Almaty oblysynda túıeni urlady degen kúdikpen qojalyq basshysy ustaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, Іle aýdanynyń polıtseılerine Mejdýrechensk aýylynyń 70 jastaǵy turǵyny aryzdanǵan. Ol 2019 jyly Jambyl oblysynyń Qordaı aýdanynda at jarysynan jeńip alǵan, quny 1 mln teńgeden asatyn túıesiniń jaıylymnan urlanǵanyn jetkizgen. Sonymen qatar, túıeniń ıesi urylardyń maldy qasaptaǵan ornyn kórsetken. Atalǵan derek QR QK-niń 188-1-baby 1-bóligi boıynsha tirkeldi.
Oqıǵa ornyna shyqqan jedel top sharýa qojalyqtarynyń birinde soıylǵan jáne bólingen túıeniń etin tapty. Polıtsııa qyzmetkerleri Mejdýrechensk aýyldyq okrýginiń aýmaǵynda ornalasqan sharýa qojalyǵynyń basshysy, Ekpindi aýylynyń 38 jastaǵy turǵynyn ustady. Ol urlyq jasaǵanyn moıyndaǵan.
Aıtýynsha, óz sharýashylyǵynyń janynan aldyńǵy aıaǵy tusalǵan qaraýsyz jaıylǵan túıeni kórgen. Urlaý maqsatynda ony aýlasyna aıdap ákelip, baýyzdaýǵa ámir bergen. Al óziniń týystaryna túıeni qaryzynyń ótemi retinde bergenin jetkizgen. Baýyzdalǵan maldyń etin kúdikti týystaryna taratpaq bolǵan. Alaıda oǵan túıeniń ıesi men polıtsııa kedergi jasady.
Kúdiktige qatysty eshqaıda ketpeý jáne durys júris-turys týraly qolhat túrindegi bultartpaý sharasy tańdaldy. Sotqa deıingi tergeý aıaqtalǵannan keıin, urlanǵan malmen «qaıyrymdylyq» jasamaq bolǵan kúdikti QR QK-niń 188-1 baby 1 bóligi («Mal urlyǵy, ıaǵnı bótenniń malyn jasyryn urlaý») boıynsha sot aldynda jaýap beredi. Oǵan qatysty 3 myń aılyq eseptik kórsetkishke deıingi aıyppul nemese sol mólsherde túzeý jumystary, ne múlkin tárkileýmen 5 jylǵa deıingi merzimge bas bostandyǵyn shekteý nemese aıyrý jazasy qoldanylýy múmkin. Sonymen qatar, ol bir mıllıon teńge kólemindegi keltirilgen materıaldyq shyǵyndy tolyq óteýge mindetti.
