Almaty oblysynda turyp, Kókshetaýdaǵy saýda úıin «jarmaqshy» bolǵan kúdikti ustaldy
KÓKShETAÝ. QazAqparat – Kókshetaýdaǵy saýda úıine «jarylǵysh zat» qoıylǵandyǵy týraly jalǵan habar bergen kúdikti ustaldy, dep habarlaıdy QazAqparat tilshisi.
Aqmola oblystyq PD baspasóz qyzmetiniń málimetinshe, aǵymdaǵy jylǵy sáýirdiń 7-de belgisiz bireý Kókshetaý qalasyndaǵy «Arbat» saýda úıiniń aýmaǵyna «jarylǵysh zat» qoıylǵandyǵyn habarlaǵan. Aıtylǵan jerge barlyq kúsh qurylymdary, shuǵyl jáne arnaıy qyzmetter jiberildi, qyzmettik tehnıka jumyldyryldy, jaqyn mańdaǵy aýmaq qorshaldy. Іzdeý sharalaryn júrgizý nátıjesinde jarylǵysh zat tabylǵan joq. Osyǵan baılanysty PD tergeý bólimi Qylmystyq kodekstiń 273 baby «Terrorızm aktisi týraly kórineý jalǵan habarlaý» boıynsha is qozǵap, sotqa deıingi is tergeý sharalaryn qolǵa aldy.
«Jedel-izdestirý is-sharalary barysynda Aqmola oblysy PD ekstremızmge qarsy is-qımyl basqarmasynyń, Kókshetaý qalasy polıtsııa basqarmasynyń qyzmetkerleri jáne Almaty qalasy PD krımınaldyq polıtsııa basqarmasynyń qyzmetkerlerimen birlesip, Almaty oblysy Eńbekshiqazaq aýdany Esik qalasy aýmaǵynda buryn sottalǵan 42 jastaǵy Almaty qalasynyń turǵynyn anyqtap, ustady. Kúdiktige qatysty qamaýǵa alý túrindegi bultartpaý sharasy tańdaldy», - dedi vedomstvodan.
Osy rette, tártip saqshylary Qylmystyq kodekstiń 273 babyna sáıkes «Terrorızm aktisi týraly kórineý jalǵan habarlaý» boıynsha qylmystyq jaýapkershilik 14 jastan bastalatynyn jáne bes jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý túrindegi jazany kózdeıtinin eske salady.
Aıta keteıik, Aqmola oblysy PD Ekstremızmge qarsy is-qımyl basqarmasynyń deregi boıynsha, tek sońǵy úsh jylda oblys aýmaǵynda salynǵan jarylǵysh qurylǵylar týraly 15 jalǵan habarlama tirkelgen, onyń ishinde 2019 jyly – 10 fakt, 2020 jyly - 2, 2021 jyly-3.
