Almaty oblysynda túrmege jiberilgen etikten esirtki tabyldy
ASTANA. QazAqparat - Almaty oblysynda temir tordyń arǵy jaǵynda otyrǵan adamǵa jiberilgen aıaq kıimniń ultaraǵynyń astyna esirtki jasyrylǵan, dep málim etti QR ІІM QAJ komıtetiniń baspasóz qyzmeti.
«Almaty oblysyndaǵy Zarechnyı kentinde ornalasqan LA-155/4 túzetý mekemesiniń qyzmetkerleri sottalýshyǵa jiberilgen sálemdemeni tekserý barysynda, qysqy krossovkanyń ultaraǵynyń astynan tsellofanǵa oralǵan belgisiz zat taýyp aldy. Arnaıy saraptama tabylǵan zattyń salmaǵy 65 gramm gashısh ekendigin anyqtady», - dep jazylǵan vedomstvo habarlamasynda. Atalǵan is boıynsha tekserý jumystary bastalyp ketti.
Osyǵan uqsas oqıǵa Pavlodar oblysynda da tirkelip otyr.
«Pavlodardaǵy tergeý ızolıatorynyń sálemdeme tapsyrý bólmesinde qala turǵyny qolǵa tústi. Onyń qamaýda otyrǵan adamǵa tapsyrǵan zattaryn tekserý barysynda tosaptan bosaǵan plastmassa ydystan marıhýana tabyldy. Arnaıy saraptama tabylǵan oramanyń esirtki ekendigin anyqtady», - dep habarlaıdy QAJ.
