Almaty oblysynda túrmedegi sottalýshylardan shaǵym túsý jıiledi
Máselen LA 155/16 túzeý mekemesinde isteıtin qyzmetker sottalýshyǵa uıaly telefon qoldanýǵa ruqsat berip, bul qamqorlyǵy úshin aqy talap etken. Al aqshany bermegeni úshin túrmeniń qyzmetkeri sottalýshyny judyryqtyń astyna alǵanǵa uqsaıdy. Qazir atalǵan fakti boıynsha tekserý júrip jatyr.
«Tekserip, zerttep qaraǵan kezde uıaly telefonnyń IMEI kodyn bárin anyqtadyq, qońyraý osy mekeme ishinen túsken. Naqty aıtqanda, sol telefondy paıdalanǵany úshin túrme qyzmetkeri sottalýshydan aqsha suraǵan. Urǵan jaǵdaıdy dáleldeı almadyq, sebebi bizge aryz eki aıdan keıin ǵana jetti», - deıdi Sybaılas jemqorlyqqa qarsy is-qımyl Ulttyq bıýrosynyń Almaty oblysy boıynsha departamenti basshysynyń mindetin atqarýshy Danııar Turǵanbaev.
Endi Ulttyq bıýronyń Almaty oblysy boıynsha departamenti túrmeniń basshylyǵyna sottalýshylardyń denesine medıtsınalyq tekserý ótkizýdi apta saıyn júrgizýdi usynyp otyr. Sondaı-aq túzetý mekemelerinde beınebaqylaý kameralarynyń da sanyn arttyrý kerek dep sanaıdy.
«Bólingen qarajat esebinen beınebaqylaý kameralary sanyn aqyryndap kóbeıtip jatyrmyz. Jalpy Almaty oblysynda 5 túzeý mekemesi bar bolsa, onyń úsheýi Zarechnyı aýylynda ornalasqan. Árqaısysynda 600-den 800-ge deıin sottalýshy jazasyn óteýde», - deıdi Almaty oblystyq qylmystyq atqarý júıesi departamentiniń basshysy Baqytjan Sadybekov.
Aryz-shaǵymdardyń jıi túsýine baılanysty Almaty oblysynyń sybaılas jemqorlyqqa qarsy jáne memlekettik qyzmet isteri departamentiniń ókilderi qylmystyq atqarý júıesi departamentiniń basshysymen birlesip, túrmede isteıtin laýazymdy tulǵalardy jınap, jıyn ótkizdi, usynystaryn jetkizdi. Sybaılas jemqorlyqtyń aldyn-alýdy maqsat etken jıyn barysynda para alyp ustalǵan qyzmetkerler jaıly arnaıy fılm de kórsetildi. Qorytyndylaı kele, Almaty oblysy boıynsha Qylmystyq-atqarý júıesi departamentiniń basshysy kóterilgen barlyq máselelerdi baqylaýǵa alýǵa ýáde berdi.
