Almaty oblysynda túngi serýendi unatatyn 300-den astam jasóspirim anyqtaldy
TALDYQORǴAN. QazAqparat - Almaty oblysynyń tártip saqshylary «Túngi qaladaǵy balalar» arnaıy sharasy barysynda 332 jasóspirimniń túngi 22.00-den keıin kóshe qydyryp, oıyn-saýyq oryndarynda júrgenin anyqtady, dep habarlaıdy QazAqparat tilshisi.
Kámeletke tolmaǵandardyń basym bóligi Taldyqorǵan qalasy men Talǵar aýdanynda tirkeýge alyndy. Olardyń deni dámhanalardan, túngi klýbtar men oıyn zaldarynan tabyldy.
Qazaqstan zańnamalaryna sáıkes, balalar men jasóspirimder túngi ýaqytta ata-analardyń jáne basqa da eresek azamattardyń baqylaýymen júrýi tıis. Tek oblys ortalyǵy boıynsha eki táýlikte 51 jetkinshek qalalyq polıtsııa basqarmasyna jetkizildi. Jalpy Almaty oblysy boıynsha zań buzýdyń 332 jaǵdaıynda 14 jasóspirimniń alkogoldik ishimdik ishkeni anyqtaldy. Sondaı-aq tártip saqshylary tirkeýge alǵan jastardyń arasynda birneshe qyz bala jáne 3-synyp oqýshysy bolǵan.
Almaty oblystyq Polıtsııa departamentiniń málimetinshe tártip saqshylary jasóspirimderdiń ata-analarymen kezdesip, áńgimelesken. Keıbir oqýshylardyń ata-anasyna aıyppul salý týraly hattama toltyryldy.
Arnaıy shara barysynda Almaty oblysynyń iri eldi mekenderi men 500-den astam oıyn-saýyq kesheni tekserildi.
