Almaty oblysynda túnde júretin jasóspirimder jappaı esepke alynyp jatyr
TALDYQORǴAN. QazAqparat - Almaty oblysynyń polıtseıleri balalar men kámeletke tolmaǵandardyń túngi bos ýaqytyn qalaı ótkizetinin tekserdi. Sharanyń alǵashqy kúni profılaktıkalyq esepke 18 jasóspirim men 11 otbasy qoıyldy, - dep habarlaıdy QazAqparat tilshisi.
Almaty oblysynda «Túngi qaladaǵy balalar» jedel aldyn alý is-sharasy bastaldy. Arnaıy sharanyń basty maqsaty – kámeletke tolmaǵandar arasynda jasalatyn jáne olar zardap shegetin qylmystar men quqyq buzýshylyqtardyń aldyn alý.
«Jedel aldyn alý is-sharasynyń birinshi kúni ıývenaldy polıtsııa ınspektorlary men basqa da qyzmetterdiń úsh júzden astam qyzmetkeri jumyldyryldy. Olarmen birge bilim jáne densaýlyq saqtaý ókilderi, prokýratýra qyzmetkerleri, sondaı-aq ata-analar komıtetteri boldy. Jedel aldyn alý is-sharasynyń alǵashqy kúni 147 oıyn-saýyq orny men 92 jertóle tekserildi», - dedi Almaty oblysy PD JPQB bastyǵy polıtsııa polkovnıgi Baǵdat Áshimov.
Sharanyń alǵashqy kúni profılaktıkalyq jáne tizimdik esepke 18 jasóspirim men 11 qolaısyz otbasy qoıyldy. Jasóspirimderdi ýaqytsha beıimdeý ortalyqtaryna qadaǵalaýsyz jáne panasyz qalǵan 3 bala ornalastyryldy. Turǵylyqty jeri boıynsha ishki ister organdarynyń esebinde turǵan 88 kámeletke tolmaǵan jáne 132 qolaısyz otbasy tekserildi.
«Bul is-shara quqyq buzýshylyqqa beıim jasóspirimderdi, sondaı-aq balalardy tárbıeleý jónindegi mindetterdi tıisti túrde oryndamaıtyn kámeletke tolmaǵandardyń ata-analaryn nemese zańdy ókilderin anyqtaýǵa múmkindik beredi», - dep atap ótti polkovnık Áshimov.
