Almaty oblysynda tótenshe jaǵdaı rejımin buzǵan 31 adam ákimshilik qamaqqa alyndy
TALDYQORǴAN. QazAqparat - Almaty oblysynda tótenshe jaǵdaı rejımin buzǵan úshin 31 tulǵa ákimshilik qamaqqa alynyp, 23-ine aıppul salanyp, 1 adamǵa eskertý jasaldy, dep habarlaıdy QazAqparat tilshisi.
Almaty oblysy Prokýratýrasynyń málimetinshe, sońǵy táýlikte rejımge qatysty quqyq buzýshylyqtardy anyqtaýǵa baǵyttalǵan jedel toptarmen 88 zań buzýshylyq anyqtalyp, hattama toltyrylyp, sotqa joldandy.Kóbinese zań buzatyn tulǵalar sanıtarııalyq-epıdemııaǵa qarsy is-sharalardy ótkizbegen jeke kásipkerler bolyp tabylady.
Mysaly, Taldyqorǵan qalasynda qyzmetin toqtatý týraly talapty eskermeı, qoǵamdyq monsha jumys istep turǵan. Osyǵan oraı, monsha ıesi 5 táýlikke ákimshilik qamaqqa alyndy.
Birneshe ret eskertý men túsindirý jumystary jasalǵanyna qaramastan, keıbir qoǵamdyq tamaqtaný oryndary 22-00 saǵattan keıin jumys istep otyrǵan, qyzmetkerlerinde sanıtarlyq qorǵaý quraldary jáne t.b. bolmaǵan.
Osyǵan baılanysty, Almaty oblysy prokýratýrasy azamattardy óz jáne basqa adamdardyń qaýipsizdigi úshin tótenshe jaǵdaı rejımi men shekteý sharalarynyń talaptaryn qatań saqtaýǵa shaqyrady.
Osy sharalardy oryndamaǵan jaǵdaıda ákimshilik jáne qylmystyq jaýapkershilik kózdelgenin eskertedi.
