Almaty oblysynda tórt jyl buryn adam óltirgen kúdikti ustaldy
TALDYQORǴAN.QazAqparat - Almaty oblysynda halyqaralyq izdeýde júrgen kúdikti ustaldy. 55 jastaǵy azamatqa adam óltirdi degen aıyp taǵylýda, - dep habarlaıdy QazAqparat tilshisi.
Kúdiktini ustaý operatsııasy Raıymbek aýdanynda júrgizildi. Er azamatqa 4 jylǵa jýyq ýaqyttan beri halyqaralyq izdeý jarııalanǵan. Ol 2015 jyldyń qarasha aıynda adam óltirdi degen kúdikke ilingen.
«Іle aýdanyndaǵy qystaqtardyń birinde malshy bolyp jumys istegen ol óziniń janyndaǵy joldasyn óltirdi degen kúdikke ilindi. Ol oqıǵa bolǵannan keıin birden izin sýytqan. Osy ýaqytqa deıin kúdikti bir jerden ekinshi jerge kóship, izdeý jumystaryn qıyndatty. Ol taýly aımaqtardyń birindegi qystaqta qolǵa tústi», - dep málimdedi oblystyq Polıtsııa departamentiniń baspasóz qyzmeti.
Vedomstvonyń málimetinshe, kúdikti Іle aýdandyq polıtsııasynyń ýaqytsha ustaý ızolıatoryna qamaldy. Oǵan qatysty materıal jaqyn kúnderi sotqa jiberiledi.
