Almaty oblysynda tórt balanyń ákesi 7 aıdan beri tabylmaı jatyr
TALDYQORǴAN.QazAqparat - Almaty oblysynda tórt balanyń ákesi, 40 jastaǵy Baqtybaı Ibragımov 7 aıdan beri tabylmaı jatyr. Asyraýshysynan qol úzip qalǵan jary Merýert Sepbosynova qazir sharasyz kúıde, dep habarlaıdy QazAqparat tilshisi.
Segiz, jeti, alty jastaǵy jáne 10 aılyq balasymen qalǵan áıel qazir kúıeýiniń aman-esen oralatynynan kúder úzgenin de jasyrmaıdy.
«Eshkimniń janyna emes, óz janyma ǵana batyp tur. Kúıeýim joǵalǵannan keıin birden jumysqa shyqtym. Biraq 27 myń teńgelik tabysym, balalardyń tamaǵyna da jóndep jetpeıdi. Endi ǵana Taldyqorǵan qalalyq jumyspen qamtý jáne áleýmettik baǵdarlamalar arqyly 4 balama 3 aıda bir ret beriletin 9 myń teńge kóleminde járdemaqy aldym. Memleket 3 aıda bir ret bolsyn 9 myń teńgeden berip jatyr. Táýbe. Biraq, qazir bári qymbat. Balalarymdy ósirip-jetkizýim kerek. Joldasymnyń ne tiri, ne óli ekenin bilmeı, jumbaq kúıde ómir súrip jatyrmyz. Eseńgirep qaldym», - deıdi Merýert Sepbosynova.
Qazir Merýert baspana jaldap, Taldyqorǵan qalasyna qarasty Aşybulaq saıajaıynda turyp jatyr eken. Balalaryna qysty kúni aıaq-kıim de alyp bere almadym degen jalǵyz basty ana jany jomart jandar qol ushyn sozsa deıdi.
«Bala-shaǵama kómek berse dep tileımin. Tórt balamnyń bolashaǵyna qatty alańdaımyn. Baspanamdy yńǵaılap alsam degen armanym bar. Eger nıetti jandar bolsa, 8775 175 28 86 nómirine habarlasýlaryn suraımyn. Qazaq jetimin jylatpaǵan halyq qoı, jany jomart jandardan úmitimdi úzbeımin» -deıdi taldyqorǵandyq turǵyn.
Esterińizge sala keteıik, Baqtybaı Kólbaıuly Ibragımovtyń joǵalǵandyǵy jóninde biz buǵan deıin de habarlaǵan bolatynbyz . 40 jastaǵy Baqtybaı Kólbaıuly men 1961 jyly týǵan Aımuhamed Omaruly 27 qazan kúni ekeýi jolǵa shyǵyp, habar-osharsyz ketken. Aqsý aýdanynan Taldyqorǵanǵa barmaq bolǵan azamattardyń biri Aımuhamed Omarulynyń óli denesi Taldyqorǵan-Mataı tas joly mańyndaǵy kólshikten tabylǵan. Al ushty-kúıli joǵalǵan Baqtybaı Kólbaıulynan áli habar joq. Eger kimde-kim osy azamatty tanyp, habardar bolsa Aqsý aýdanynyń ІІB habarlasýyn, jary Merýert Sepbosynova kópshilikten suraıdy.
