Almaty oblysynda tórt aı buryn joǵalǵan oqýshynyń óli denesi tabyldy
TALDYQORǴAN. QazAqparat - Almaty oblysynda 29 maýsymda joǵalǵan Isa Bekbaevtyń óli denesi tabyldy. 13 jastaǵy oqýshynyń múrdesin sot-medıtsınalyq saraptamaǵa alyp ketti, dep habarlaıdy QazAqparat tilshisi.
Almaty oblystyq TJD baspasóz qyzmetiniń ókili Azamat Jurtbaevtyń aıtýynsha, balanyń máıitin jergilikti turǵyn ózen jaǵasynan kezdeısoq kórip qalǵan.
«Balanyń denesi Úshtóbe qalasyndaǵy Qaratal ózeniniń jaǵasynan tabyldy. Máıitti saraptama jasaý úshin máıithanaǵa alyp ketti», - dedi A. Jurtbaev.
Al oblystyq ІІD baspasóz qyzmetiniń málimetinshe, oqýshynyń múrdesi 21 qazan kúni oqıǵa ornynan úsh shaqyrymda ornalasqan Qojban aýylynyń tusynda ózen arnasynan tabylǵan.
«Balanyń máıitin týystary tanydy. Qazirgi tańda osyndaı jaǵdaılarda júrgizilýi tıis sot-medıtsınalyq saraptamasy taǵaıyndaldy. Saraptama qorytyndysy balanyń neden qaıtys bolǵanyn anyqtaıdy. Bastapqy nusqa boıynsha jasóspirim sýǵa batyp ketken. Bul týraly kýágerler de aıtqan bolatyn», - dep málimdedi atalǵan vedomstvodan.
Esterińizge sala keteıik, 29 maýsym kúni joǵalǵan. Ol dosymen balyq aýlaýǵa ketip, sol kúıi úıine oralmaǵan. 13 jastaǵy balany oblys qutqarýshylary 16 kún boıy izdep, jumystary nátıje bermegen edi. Sol sebepti balany izdeý toqtatylǵany jóninde onyń ata-anasyna resmı hat arqyly habarlanǵan.
Biraq balasy «Qaratal ózenine aǵyp ketti» degenge senbegen ata-ana oblystyq ІІD-ge arnaıy baryp, basshylyǵynan izdeýdi keshendi túrde júrgizýdi surady. Tártip saqshylary izdeý jumystary qaıta jalǵastyrǵan bolatyn.
