Almaty oblysynda toǵannan 2 tonna óli balyq tabyldy
NUR-SULTAN. QazAqparat - Almaty oblysynda sýy lastanǵan «Pervomaı toǵanynan» 2 tonna óli balyq tabyldy, dep habarlaıdy QazAqparat tilshisi Energetıka mınıstrliginiń baspasóz qyzmetine silteme jasap.
«2019 jyldyń 7 sáýirinde Іle aýdany Aşybulaq aýyldyq okrýginiń Túımebaev aýylynyń janynda ornalasqan «Pervomaı toǵany» alqabynda kollektor jaryldy. Osynyń saldarynan sarqyndy sý toǵanǵa quıyldy. Apat ornynan 2 tonna óli balyq tabyldy», - dep habarlady mınıstrlikten.
Atalǵan oqıǵa boıynsha QR EM Ekologııalyq retteý jáne baqylaý komıtetiniń Almaty oblysy boıynsha Ekologııa departamenti «Almaty Sý» mekemesiniń qyzmetine tekserýdi bastady.
«Ekologııa departamentiniń zerthanalyq-analıtıkalyq baqylaý bólimi salystyrmaly zertteýler júrgizý úshin sý synamalaryn aldy. Sondaı-aq «Almaty Sý» ShJQ MKK mamandary laboratorııalyq zertteýler men sanıtarlyq-hımııalyq taldaýlar júrgizý úshin sý synamalary men balyq synamasyn aldy. Aldyn ala málimet boıynsha, qubyrdyń jarylýy jaýyn-shashynnyń kóp bolýy jáne káriz kollektorlarynyń biriniń tozýy saldarynan bolǵan. Sarqyndy sýlar quıylǵan kezde aıdynda shamamen 200 myń tekshe metr sý bolǵan. Toǵanǵa túsken sarqyndy sýdyń kólemi boljammen 13 myń tekshe metrdi quraıdy», - dep habarlandy vedomstvodan.
Zııandy zattardyń kontsentratsııasyn tómendetý úshin toǵannan kólemi 4 myń tekshe metr sýdy kollektorǵa keri aıdaý júrgizildi. Sonymen qatar sý deńgeıi tómendetilip, toǵan taza sýmen toltyrylǵan.
«Bul is-sharalar sýdaǵy ammıaktyń quramyn 3 esege tómendetýge múmkindik berdi. Lastanǵan toǵannan basqa sý qoımalaryna sý túsý qaýpiniń aldyn aldy. Sýdy tazartý jumystary jalǵastyrylatyn bolady. Qazirgi ýaqytta uzyndyǵy 210 metr jeke toǵan boıynan ótetin tozǵan qubyrlardy aýystyrý máselesi sheshilýde. Qorshaǵan ortaǵa keltirilgen zalal jospardan tys tekserý aıaqtalǵannan keıin anyqtalatyn bolady», - delingen baspasóz habarlamasynda.
